په کندوز کې هېڅ چاپي رسنۍ نه خپريږي

په لومړي وار د کندوز له سقوط کېدو راهیسې شاوخوا یو نیم کال کېږي، چې له هماغه وخت را په دې خوا د دغه ولایت خپلواکو چاپي رسنیو نشرات غوڅ شوي دي.

د کندوز ولایت د خپلواکو چاپي رسنیو یو شمېر مسوولین وايي، طالبانو د دې ولایت د سقوط پرمهال د چاپي رسنیو ټول وسایل چور، تالان کړل؛ د دغو رسنیو کار په ټپه ودرېد.

دوی وايي، د شاوخوا یو نیم کال راهیسې د خپلواکو رسنیو چاپ چارې په دې ولایت کې پرې دي او هېڅ خپلواکه رسنۍ چاپي نشرات نه لري.

د ندای امت میاشتنۍ ورځپاڼې د امتیاز خاوند منهاج الدین یعقوبي سلام وطندار سره په مرکه کې وویل، د ډاډمن امنیت نه شتوالی او د کافي بودیجې نه شتوالی د دې لامل شوي، چې په د دې ولایت چاپي ورځپاڼې نشرات ونه کړي.

دغه راز د کندوز رسنیزې ورځپاڼې د امتیاز څښتن ذبیح الله مجیدي سلام وطندار ته وویل، دغه ورځپاڼه له ۶ کلونو راهیسې چاپېدله او تېراژ یې ۱۰۰۰ رسېده؛ خو د کندوز له ګډوډې را په دې خوا نه چاپيږي.

همدارنګه له کندوز ولایته د پانګه‌والو وتلو هم د دې ولایت د چاپي رسنیو چاپ چارې له اقتصادي پلوه مشکل سره مخ کړي دي.

د کندوز د والي ویاند سید محمود دانش د امنیت نه شتون په اړه د ازادو چاپي رسنیو د خاوندانو اندېښنې د چاپي رسنیو دویم ځلي نه فعال کېدو لامل بولي؛ خو ټینګار کوي، چې حکومت د چاپي رسنیو د خپرونو ملاتړ په موخه امنیت ټینګښت کې ژمن دی.

د شمېرو له مخې، د کندوز له سقوط وړاندې د اوونیزو او میاشتنۍ ترڅنګ په دغه ولایت کې ۱۰ خصوصي چاپي رسنۍ خپرونې لرلې؛ اوسمهال یې چاپ چارې په ټپه ولاړې دي.

سلام وطندار شاوخوا یو کال مخکې هم د کندوز غیرفعالو چاپي رسنیو په تړاو راپور خپور کړی و؛ خو تراوسه لېدل کېږ، چې حکومت د چاپي رسنیو د کار بیاځلې فعالیت ته هېڅ پاملرنه نه ده کړې.