د افغانستان په شمال کې د ملګرو ملتونو د ماین پاکولو مرکز (UNMACA) وايي، چې په کلیو او بانډو کې د ښخ شویو ماینونو د چاودنې له کبله د ولسي خلکو مرګ ژوبله په بې ساري ډول زیاته شوې ده.
د دغې ادارې د شمېرو له مخې په کلیو او بانډو کې هر ورځ د ماینونو د چاودنو له امله د ولسي خلکو د مرګ ژوبلې شمېر له ۳۰ تر ۱۰۰ تنو رسېږي.
د افغانستان په شمال کې د ملګرو ملتونو د ماین پاکولو مرکز رییس عبدالوکیل احمدزي له سلام وطندار سره په مرکه کې وویل، چې تېر کال په هېواد کې د ماینونو د چاودنې له امله د ورځنۍ مرګ ژوبلې شمېر ۳۰۰ تنه وو.
ده وویل، چې دغې ادارې په ۲۰۱۴ کال کې د مرګ ژوبلې ورځنۍ کچه ۳۰ تنو ته را کمه کړه، خو له ۲۰۱۴ را په دې خوا دغه شمېر په ناببره ډول ۱۰۰ تنو ته لوړ شو.
احمدزی زیاتوي، چې د فاریاب ولایت المار او قیصار ناامنه ولسوالیو زیات شمېر اوسېدونکي د ماینونو قربانیان دي.
دغه اداره وايي، چې د دې تلفاتو د کچې کموالي په برخه کې باید د جګړې له وخته پاتې شویو توکو پېر او پلور بند شي.
احمدزي وویل، چې د جوماتونو امامانو او د پوهنې وزارت د مسولینو د عامه پوهاوې په مرسته دغه تلفات را کمولی شو.
د دوی پر خبره د هېواد په شمال کې د ناچاوده توکو په برخه کې د نه پوهاوي له کبله د ولسي وګړو مرګ ژوبله زیاته شوې ده.
دا په داسې حال کې ده، چې تر جګړې وروسته دویم هغه څه چې د افغان کورنیو غړي یې دردولي دي ناچاوده توکي او په ځمکه کې ښخ شوي ماینونه دي.
