د ټاکنو خپلواک کمېسیون یوه کمېشنر مولانا محمد عبدالله پر خپلې ټویټرپاڼې لیکلي چې د بېلابېلو لاملونو له مخې ونه توانېدل چې د ولسمشري ټاکنو ته د رایورکوونکیو د تقویتي نوملیکنې بهیر لپاره تبلیغاتي پروګرام ولري.
دغه کمېشنر لیکلي چې له عامه پوهاوي پرته د تقویتي نوملیکنې عملیات د بېاودسه لمانځه په شان دی.
د فیفا او ټیفا مسوولان هم وايي چې ټنبلي، د بېلابېلو پړاوونو لپاره د ځانګړي پلان نشتوالی، کمزورتیا او مدیریتي وړتیاوو تشه هغه لاملونه دي چې عبدالله یې یادونه کړې ده.
د ازادو او عادلانه ټاکنو بنسټ یا فیفا اجرایوي رییس یوسف رشید وایي چې په ټاکنو خپلواک کمېسیون کې د ځانګړي پروګرام نشتوالی، جوړښتي ګډوډي، نه همغږي او ځانمحوري هغه لاملونه دي چې د دغه کمېسیون د تبلیغاتي کړنلارې مخه یې ډب کړې ده.
د رڼو ټاکنو بنسټ یا ټیفا رییس نعیم ایوبزاده هم د کاري ظرفیت، وړتیا، ټاکنیزې تجربې او مدیریت نشتوالی او پر هېواد واکمن سیاسي چاپېریال د ټاکنو خپلواک کمېسیون د کاري بهیر د ګډوډي لاملونه بولي.
- د رایورکوونکیو تقویتي نوملیکنه پڅه روانه ده
- غزني کې د رایورکوونکیو د تقویتي نوملیکنې مخه ونیول شوه
- د ټاکنو لپاره تقویتي نوملیکنه نن پیلېږي
د ټاکنو خپلواک کمېسیون پخوانی رییس ګلاجان عبدالبدېع صیاد بیا د تقویتي نوملیکنې لپاره د تبلیغاتي پروګرام نشتوالي لامل، اقتصادي ګڼي.
نوموړی وایي، نړیوالو ډونرانو او افغان دولت پر وخت د ټاکنو بودیجه نهده ورکړې چې کمېسیون یې څو ځله یادونه هم کړې ده.
ومو غوښتل چې پهدې اړه د ټاکنو خپلواک کمېسیون نظر هم ولرو، خو له پرلهپسې اړیکو سره سره ونه توانېدو.
د ولسمشري ټاکنو ته د تقویتي نوملیکنې بهیر د غبرګولي پر ۱۸مه د شنبې په ورځ پیل او د چنګاښ تر اتمې به روان وي.
سره له دې چې د دغه بهیر له پیله ۴ ورځې تېرېږي، خو د راپورونو له مخې، د نوملیکنې مرکزونو ته لږ کسان ورغلي دي.
