نن د ورځې شاوخوا یوه نیمه بجه د ننګرهار ولایت په کامې ولسوالۍ کې له دغه ولایته ولسي جرګې ته د نوماند عبدالناصر مومند په کمپایني غونډه کې ځانمرګی برید شویدی.
ویل شوي، د برید پر مهال نوماند ناصرخان دفتر کې نه و؛ خو تر یوې لنډې غونډې وروسته د ډوډۍ پر مهال ځانمرګي بریدګر د سلګونو کسانو په منځ کې ځان ته چاودنه ورکړې ده.
د پېښې عیني شاهدان وايي، دا زوروره چاودنه د کمپایني غونډې د لسګونو ګډونوالو په منځ کې د ډوډۍ پرمهال شوېده.
په همدې حال کې د ننګرهار د والي ویاند عطاالله خوږیاڼي رسنیو ته ویلي، دې پېښې کې ۱۳ تنه وژل شوي او ۴۲ تنه ټپيان دي.
دی وايي، د پېښې ډېری قربانیان د پاخه عمر کسان دي.
هاخوا د ننګرهار د عامې روغتیا ریاست ویاند انعام الله میاخیل سلام وطندار ته ویلي، له یادې پېښې د کامې ځايي او د جلالاباد حوزوي روغتون ته ۱۳ جسدونه او ۴۲ ټپيان وړل شويدي چې دمګړۍ د ټپیانو درملنه روانه ده.
هغه وايي، د پېښې د ځېنو ټپیانو روغتیايي حالت نازک دی.
عیني شاهدان وايي، یاده پېښه کې د ناصرخان مومند د کمپاین مشر پتنګ خان هم وژل شوی؛ خو رسمي سرچینو پهدې اړه څه نهدي ویلي.
تر اوسه د دې پېښې مسوولیت کومې وسلهوالې ډلې نهدی منلی.
دا په ختیځو ولایتونو کې پر کمپایني غونډو لومړی او د هېواد په کچه دویم برید دی.
وړمه ورځ خوست کې هم د یوه نوماند غونډه کې چاودنه شوېوه.
