د کندهار معروف او نېش ولسوالیو اوسېدونکي وايي، د یادو ولسوالیو هېڅ اوسېدونکي په راتلونکیو ټاکنو کې د ګډون لهپاره نوملیکنه کړې نهده.
دوی وايي، د ټاکنو کمېسیون کارکوونکي د نوملیکنې پرمهال معروف او نېش ولسوالیو ته ورغلي نهدي او حکومت، په ځانګړي ډول د ټاکنو خپلواک کمېسیون باید د یادو ولسوالیو اوسېدونکیو ته په ټاکنو کې د ګډون لهپاره قانوني لار ولټوي.
د یادو ولسوالیو اوسېدونکي شریفالله او محمدالله چې د اعتراض په توګه کندهار ښار ته راغلي وايي، په ټاکنو کې ګډون ته لېواله دي او حکومت، په ځانګړي ډول د ټاکنو کمېسیون باید ورته د ګډون اسانتیاوې برابرې کړي.
په همدې حال کې د کندهار د بشري حقونو پلویان او مدني فعالان هم پهدې اړه اندېښنه ښيي او وايي چې د ټاکنو کمېسیون باید د یادو ولسوالیو اوسېدونکیو ته په ټاکنو کې د ګډون قانوني لار ولټوي چې دوی هم د نورو هېوادوالو په څېر له خپل قانوني حقه ګټه واخلي.
دوی پر وسلهوالو طالبانو هم غږ کوي چې په ملي پروسو کې د خلکو د ګډون مخه ونه نیسي.
خو کندهار کې د ټاکنو کمېسیون ولایتي دفتر مرستیال هارون کلیوال وايي، په معروف او نېش ولسوالیو کې د ټاکنو لهپاره نوملیکنه شوې نهده او همدا لامل دی چې په یادو ولسوالیو کې به د ټاکنو په ورځ ټاکنیز مرکزونه هم تړلي وي.
د نوموړي په وینا، د یادو ولسوالیو ترڅنګ د کندهار ۶ نورې ولسوالۍ؛ لکه: ښوراوک، رېګستان، خاکرېز، میانشین، غورک او شاهوليکوټ ولسوالیو کې هم د امنیتي ګواښونو له کبله د ټاکنو پروسه ټکنۍ او د خلکو ګډون هم کمرنګه شي.
په کندهار کې ټولټال ۱۱۲ کسان د ولسي جرګې ټاکنو ته نوماند شوي چې ۱۳ یې ښځینه دي چې د دوی له ډلې به ۸ نارینه او ۳ ښځینه د ولسي جرګې غړیتوب ترلاسه کړي.
