د طالبانو د امارت له سقوط وورسته په هېواد کې خلکو ورځ تر بلې د علم د حاصلولو هڅې ګړندې کړې. دا په یونیم کال کې هغه څه دي چې منکرېدلی ترې نهشو.
د همدې عمومي لېوالتیا په دوام تازه د لغمان ولایت ځېنو زدهکړیالانو د دې ولایت زدهکوونکیو ته په وړیا ډول د انګلیسي ژبې، د ښوونځیو مضامین او دینې زدهکړې ورکوي.
د ننګرهار پوهنتون د حقوق او سیاسي علومو زدهکړیال عزتالله مروان او د دې ښوونیز مرکز د رهبرۍ غړی وايي، جنګ او ناامنیو د ډېرو کورنیو ماشومان زیانمن کړي او بېبرخلیکه کړيدي.
د ښاغلي مروان په وینا، دا وړیا ښوونیز مرکز د بېبرخلیکه ماشومانو د ژوند د نابودۍ نه د مخنیوي په پار جوړ شویدی.
تر دمګړۍ پهدې وړیا ښوونیز مرکز کې ۳۰۰ ماشومان زدهکړې کوي چې ۱۰۰ نجونې دي.
د حقوق او سیاسي علومو زدهکړیال او د دې ښوونیز مرکز مالي مسوول سنګر ساحل د ځېنو سختو مشکلاتو په اړه وايي چې په لومړي سر کې یې وګالل؛ خو اوس هغه مشکلات کم شوېدي.
په ورته وخت کې د دې ښوونیز مرکز زدهکوونکي وايي، احساسوي چې دنیايي د بدلون په حال کې ده او پهدې اړه خوشاله هم دي.
د لغمان په شان نسبتاً ناامن ولایت کې چې په سلګونو دولتي او خصوصي ښوونځي او ښوونیز مرکزونه په کې تړلي؛ د وړیا ښوونیز مرکز پرانیستل د ستاینې کار دی. که څه هم دا ښوونیز مرکز کوم ځانګړې ودانۍ نه لري او زدهکوونکي په یو باغ کې زدهکړې کوي؛ خو د ټولو زدهکوونکیو او کورنیو لهپاره محترم ګڼل کېږي.
