.jpg)
د هرات په شنډنډ ولسوالۍ کې د طالبانو په خپل منځي نښته کې له ۱۰۰ تنو زیات طالبان وژل شوي دي.
د هرات ولایتي ادارې مطبوعاتي مسوول جیلاني فرهاد سلام وطندار سره په مرکه کې وویل، چې له دوشنبې ورځې راهیسې د وسله والو طالبانو د دوه ډلو تر منځ د دغه ولایت د شینډنډ په ولسوالۍ کې نښته روانه ده، چې له ۱۰۰ زیات طالبان په کې وژل شوي دي.
د دوی د معلوماتو له مخې، نښته د ملا صمد او ملا ننګیال د وسله والو ډولو ترمنځ راونه ده.
فرهاد وویل، چې ملا صمد د ملا اخترمحمد منصور د ډلې نظامي قوماندان او ملا ننګیال د ملا رسول له نظامي کسانو څخه دی.
نوموړی زیاتوي، چې په دې نښته کې د ملا ننګیال ۶۰ تنه او د ملا صمد او ۴۰ تنه وسله وال کسان وژل شوي دي.
د هرات والي د دفتر مطبوعاتي مسوول پر وینا، په دې جګړه کې له دواړو لوریو یو شمېر وسله وال کسان ټپیان شوي هم دي.
د ده وايي، چې افغان امنیتي ځواکونو د دواړو وسله والو ډلو نظامي مورچې په توپونو ویشتي دي.
جیلاني فرهاد په خبره، د ملي اردو د توپونو په هوايي بریدونو کې له دواړو خواوو زیات شمېر طالبان وژل شوي او ټپيان شوي دي.
د وسله والو طالبانو جلا شوې ډلې په داسې حال کې په خپلو کې نښتې کوي، چې د ملا عمر د مړینې د خبر له تایید وروسته، د طالبانو په لیکو کې د مشرتابه پر سر د نظر اختلاف را منځته شو او دومره جدي شو، چې له امله یې طالبان په څو ډلو ووېشل شول او په خپلو کې یې وسله والې نښتې پيل کړې.
