په افغانستان کې د اوسپنې د اوبه کولو د یوې سترې فابریکې د بنسټ ډبره نن په کابل کې کېښودل شوه.
دغه فابریکه د ۲۵ میلیونو ډالرو په ارزښت جوړيږي او په یوه ورځ کې به ۴۰۰ زره ټنه په نړیوال معیار برابر سیخ ګول تولید کړي.
دغه فابریکه د «خان سټیل» په نامه یادېږي او مشر یې محمد خان وايي، چې د دې کارخانې په فعالېدلو سره به ۶۰۰ کسانو ته کاري موکې پیدا شي. خان سټیل فابریکه په ۱۵ جریبه ځمکه کې په شپږو میاشتو کې ګټې اخیستنې ته وړاندې کېږي.
د اقتصاد وزیر ستار مراد د دې فابریکې د بنسټ اېښودنې په مراسمو کې وویل، چې دولت د هېواد د ځان بساینې له پاره له خصوصي تولیدي شرکتونو ملاتړ کوي.
مراد وویل، چې وروسته له دې هڅه کوي، چې ډېرې پروژې په کور دننه هغو کارخانو ته ورکړي، چې د عملي کولو توان یې ولري.
په اقتصادي چارو کې د ولسمشر ځانګړي سلاکار عمر زاخېلوال، چې په دغه مراسمو کې ګډون درلود، دغه ډول کارخانې د هېواد د وګړو د هیلو د پوره کېدلو له پاره ډېرې اړینې وګڼلې.
زاخېلوال وویل، چې په تېر یو کال کې په افغانستان کې د ناامنیو له امله ډېر پانګه وال له پانګې اچونې نه منصرف شول او بهر هېوادونو ته لاړل. هغه په هېواد کې دننه د فابریکو جوړلو د امنیت د ټینګښت له پاره یو اړین عنصر وګڼلو.
دغه فابریکه د دوو سوداګرو له خوا جوړه شوې ده. د فابریکې څښتنان وايي، چې د دې فابریکې په جوړېدلو سره به د هېواد ۴۰ سلنه سیخ ګول د همدې فابریکې له خوا تولید شي.
دمګړۍ په ټول افغانستان کې د اوسپنې د ویلې کولو ۸ فابریکې موجودې دي، چې په کال کې ۶۰۰ زرو ټنه سیخ ګول تولیدوي.
