تېره ورځ (یکشنبې) د افغانستان د پانګونې نه د ملاتړ ادرې (ایسا) له برېښنا شرکت سره د هېواد د صنعتکارانو د برېښنا د ستونزو د څېړلو او دغو صنعتکارانو ته د برېښنا د وېش پر اسانتیاوو خبرې وکړې.
په دغه غونډه کې د برېښنا شرکت مشر عبدالرزاق صمدي د هغې برېښنا په اړه چې په وروستیو کلونو کې یې د صنعتکارانو لپاره ځانګړې کړې وه، وویل، چې د صنعت کارانو له خوا د داخلي تولیداتو د تولید له امله به دوی ته په کم قیمت برېښنا ورکړي.
د برېښنا رییس همدارنګه د ۲۰ مېګاواټه ټرانسفرمر فعالول، د صنعتکارانو د سهولیت لپاره یو ښه زېری وبللو او ویې ویل، چې دغه ټرانسفرمر به په نېږدې دوو میاشتو کې فعال شي.
د ایسا ادرې مشر محمد قربان حقجو هم په دغه غونډه کې وویل، چې په هېواد کې له ۲۷ صنعتي پارکونو څخه یواځې ۵ پارکونه د دولتي برېښنا له نعمته برخمن دي.
حقجو د برېښنا شرکت د برېښنا د بیو د کموالي په اړه له شرکت نه مننه وکړه. هغه همداراز د برېښنا شرکت له مسولینو وغوښتل چې د هېواد د صنعتکارانو لپاره د برېښنا ځانګړې شبکه جوړه کړي.
ویل کېږي، چې تر اوسه د زیاترو صنعتي پارکونو برېښنا د استوګنې له ځایونو او ساختمانونو سره یو شان دی. د برېښنا شرکت مسولان وايي، په هر ډول شرایطو کې دې ته چمتو دي، چې د هېواد صنعتکارانو ته په کمه بیه برېښنا ورکړي.
