د عامې روغتیا وزیر فېروزالدین فېروز نن ملت ته د دولت ځواب وینې د غونډې پر مهال په هېواد کې د کرونا ویروس د خپرېدو په اړه وروستی راپور خپور کړ.
فېروز له هېوادوالو وغوښتل چې په خلکو کې د کرونا ویروس د خپرېدو د لوړ ګواښ له کبله د نوي کال نمانځلو په مراسمو کې ګډون ونه کړي.
د روغتیا وزیر په هېواد کې د کرونا ویروس د تشخیص لوړ لګښت ته په اشارې چې هر مورد یې ۱۶۰۰ امریکايي ډالره لګښت لري وویل، د کرونا ویروس ډېری شکمن کسان چې د ویروس جدي نښې یې په وجود کې تشخیص نه شي، بېرته ردېږي.
د هرات والي عبدالقیوم رحیمي هم په یوې خبري غونډه کې وویل چې په هرات کې هم د کرونا ویروس د پراخېدو مخنیوي لپاره دې دیني عالمان پرېکړه وکړي، څو په دغه ولایت کې د جمعې لمنځونه تر یوې مودې پورې وځنډېږي.
رحیمي له امنیتي ځواکونو وغوښتل چې د حمامونو او عمومي سالونونو د فعالیتونو او غونډو مخه ونیسي.
کرونا ویروس له دوو میاشتو راهیسې په نړیواله کچه د خلکو د ژوند لپاره په جدي ګواښ بدل شوی دی. دولتونو د دغه ویروس د خپرېدو مخنیوي لپاره ځانګړي تدابیر نیولي او افغان حکومت هم د یاد ویروس د خپرېدو مخنیوي لپاره ۲۵ میلیونه ډالر ځانګړي کړي دي.
اړوند مطالب:
کرونا؛ هرات کې نوی ښوونیز کال وځنډېده
