تېره شپه شاوخوا ۱۱ بجې په بلخ ولایت کې د جرمني هېواد کونسلګرۍ مخې ته چاودنه وشوه.
د چاودنې له سیمې عیني شاهدانو سلام وطندار ته وویل، چې له چاودېدونکو توکو دوو ډکو موټرو د کونسلګرۍ مخې ته چاودنه کړې.
په ورته وخت کې د بلخ امنیې قوماندانۍ د امنیت امر عبدالرزاق قادري وايي، چې چاودېدونکي توکي په یو هېنو ډوله موټر کې ځای پر ځای شوي وو او د کونسلګرۍ ودانۍ ته څېرمه یې چاودنه کړې ده.
دی وايي، په چاودنه کې د کونسلګرۍ ودانۍ یوه برخه دېوال ویجاړ شوی دی، خو د کونسلګرۍ مامورینو ته مرګ ژوبله نه ده اوښتې.
په ورته وخت کې د بلخ ملکي روغتون ډاکټران وايي، چې د چاودنې له سیمې ورته ۳۳ ټپیان او ۶ تنه د وژل شویو جسدونه ور وړل شوي دي.
افغان ولسمشر محمد اشرف غني د بلخ ولایت په مرکز مزارشریف کې د جرمني هېواد به کونسلګرۍ د پرونۍ شپې برید غندلی دی.
غني له ارګ څخه په خبره شوې خبر پاڼه کې ویلي، چې " د افغانستان دوښمنان د ټولو بینالمللي قوانینو او انساني ارزښتونو خلاف په ملکي، ټولګټو او دیپلوماتیکو اماکنو د وحشیانه بریدونو له لارې د بشر ضد جنایتونه کوي."
د چاودنې مسوولیت وسله والو طالبانو په غاړه اخیستی دی.
