د بغلان ولایت سیمه ییز چارواکي وايي، چې وسله والو طالبانو کروندګرو ته ګواښ کړی، چې په دې موسم کې دې په خپلو کروندو کوکنار وکري.
د دغه ولایت د امنیې قوماندانۍ د امنیت امر عبدالرشید بشیر وايي، چې طالبان تر خپل واک لاندې سیمو کې د نشه یي توکو د کاروبار تر څنګه په سیمه ییزو خلک ډول ډول ظلمونه کوي.
په دې اړه د بغلان ولایت ځېنې بزګران وايي، چې د طالبانو له سقوط وروسته د اوسني حکومت په راتګ سره د دې ولایت په بېلابېلو سیمو کې د کوکنارو کرولو کچه صفر ته را ټیټه شوې وه.
دوی زیاتوي، په دې وروستیو وختونو کې د طالبانو له موجودیت سره کروندګر دې ته مجبور شوي دي، چې په خپلو ځمکو کوکنار وکري.
د بغلان ولایت اوسېدونکي وايي، چې د دې ولایت په ډنډشهاب الدین او ډنډغوري سیمو کې د نور سیمو په پرتله په زیاته کچه کوکنار کرل شوي دي.
دوی وايي، چې طالبان د نشه یي توکو له کاروباره ځان تمویلوي.
په ورته وخت کې د بغلان ولایت له نشه یي توکو سره د مبارزې رییس فضل الحق اندرابي، له دې موضوع ناخبري ښيي، خو زیاتوي، چې سږکال په بغلان ولایت کې د تېرو کالونو په پرتله زیات کوکنار کرل شوي دي.
اندرابي په دې ولایت کې د کوکنارو د کرکیلې د زیاتو لامل ناامني او د طالبانو نفوس بولي.
دی وايي، چې د بغلان ولایت په ده صلاح، پل حصار، جلګه، برکه، تاله او برفک ولسوالیو کې پر ۱۹۰ هکټاره ځمکه کوکنار کرل شوي دي.
دی وايي، چې د دغو ولسوالیو او سیمو زیاته برخه د طالبانو او نامسووله وسله والو کسانو په واک کې ده.
طالبانو تر اوسه پورې په دې اړه څه نه دي ویلي.
دا په داسې مهال کې ده، چې د وروستیو راپورونو له مخې په افغانستان کې د نشه یي توکو او کوکنارو د تولید او کرکیلې کچه را کمه شوې ده.
