یو شمېر پوځي شنونکي او د ولسي جرګې غړي وايي، چې اوسمهال په امنیتي او پوځي څانګو کې د هېواد اطلاعاتي څانګو ته اجازه نه ورکول کيږي، چې په سمه او ازاده توګه خپله دنده پرمخ یوسي.
دوی زیاتوي، چې د افغان حکومت د اطلاعاتي څانګو ازاد فعالیت مخنیوی د دې لامل شوی، چې د ملي اردو او نورو امنیتي څانګو کې وسلهوال مخالفین نفوذ وکړي او وروسته بیا خونړي بریدونه ترسره کړي.
د ولسي جرګې یو شمېر غړي او ځینې سیاسي شنونکي وايي، چې ترڅو پورې حکومت د اطلاعاتو شبکو پر پیاوړتیا پانګونه ونه کړي امنیتي وضعیت به ښه نهشي.
طالبانو د جمعې ورځ بلخ کې پر ۲۰۹ شاهین قول ډله ییز برید وکړ، چې په پایله کې یې د ملي اردو له ۱۰۰ زیات اړوندان وژل او ټپیان شوي دي.
یو شمیر پوځي شنونکي او د ولسي جرګې غړي د اطلاعاتي شبکو کمزورتیا د دا ډول خونړیو بریدونو لامل بولي او ټینګار کوي، چې باید حکومت اجازه ورکړي امنیتي مسلو کې د اطلاعاتي څانګو لاس ازاد وي او له بېځایه لاسوهنې ډډه وکړي.
د ولسي جرګې غړی عارف رحماني وايي، چې امنیتي ځواکونه د طالبانو پر ضد په ټول توان مبارزه کوي، خو د امنیتي ځواکونو اطلاعاتي برخه کمزورې ده.
همدارنګه د پوځي چارو شنونکي عتیق الله امرخیل سلام وطندارته وویل، چې کمزوری مدیریت، پراخ فساد، اړیکې او د جزا قانون نه پلي کیدو له امله طالبان د امنیتي ځواکونو په لیکو کې ځري پيدا کوي.
امرخیل زیاته کړه، چې افغان چارواکي هیواد ته د خدمت پر ځای د څوکۍ او قدرت په فکر کې دي.
بل پوځي شنونکي کابل خان تدبیر هم سلام وطندارته وویل، ترهغو چې د افغانستان استخباراتي څانګې په سمه توګه سمبال نه شي وضعیت به ښه نشي.
د تدبیر پروینا، په امنیتي بنسټونو کې د مکافاتو او مجازاتونو قانون نشتوالي او په دغو بنسټونو کې د زورواکانو نفوذ ددې سبب شوی چې هیواد هره ورځ د ورته شان خونړیو بریدونو شاهد واوسي.
خو د ملي دفاع وزارت ویاند دولت وزیري د شنونکو خبرو په رد سره وویل، چې په وروستیو کلونو کې د ملي دفاع وزارت په بیلابیلو برخو کې وړ او تکړه کسان پر دندو ګومارل شوي دي.
وزیري زیاته کړه، چې امنیتي ځواکونه په څو ولایتونو کې د ترهګرو ډلو پر ضد جنګیږي:
وزیري بلخ کې په ۲۰۹ شاهین قول اردو کې د طالبانو نفوذ ردوي.
د سیاسي چارو شنونکو او د ولسي جرګې غړو سربیره د ټولنیزو رسنیو یو شمیر کارونکو هم د ۲۰۹ شاهین قول اردو انځورونو په خپرولو سره د امنیتي چارواکو پر کمزورتيا کلکې نیوکې کړې دي.
