د نومبر ۲۰ نېټه د ماشومانو له نړیوالۍ ورځې سره برابره ده. دغه ورځ په ټوله نړۍ کې نماځل کېږي او افغانستان هم هر کالې دغه ورځ د ماشومانو په برخه کې د شمېرو په ارایه کولو نمانځي.
د پوهنې وزارت د نشرانو رییس کبیر حقمل وویل، چې د یونیسف او نورو نړیوالو بنسټونو د شمېرو له مخې په افغانستان کې شاوخوا ۳ میلیونه ماشومان زده کړو ته لاس رسی نه لري او زیات یې کړه، چې نا امني، ناوړه دودونه او بېوزلي زده کړو ته د ماشومانو د نه لاس رسي لاملونه دي.
د کار او ټولنیزو چارو وزارت د رسنیو سلا کار عبدالفتاح احمدزي سلام وطندار ته وویل، هغه شمېرې چې دوه کاله مخکې خپرې شوې وې، ښکاره کوي، چې په هېواد کې ۳ میلیونه ماشومان کار کوي او له دې ډلې یو نیم میلیون ماشومان په سختو او درنو کارونو بوخت دي.
افغانستان کې ماشومان د ټولنې زیانمنه طبقه ده او د یوې مړۍ ډوډۍ د پيداکولو له پاره د کور له چارو نیولې د واټونو او سړکونو پر سر له خپل توان پورته کارونه کوي.
د راپورونو له مخې اوس هم په افغانستان کې د جګړو په کرښو کې ماشومان موجود دي، په ماشومانو جنسي تېري کېږي او په کوچني والي کې د هغوی ودونه هغه لاملونه دي، چې اوس هم افغان ماشومان ورسره لاس او ګرېوان دي.
