دغه برېد د ارزوګان ولایت د خاص اروزګان ولسوالۍ په سلطان محمد ناوه سیمه کې د سیمه ییزو پولیسو د یو مشهور قومندان پر کور شوی دی.
د قومندان عبدالصبور پر کور تېره شپه ناوخته برید شوی دی.
یوې امنیتي سرچینې د نوم نه اخیستلو په شرط سلام وطندار ته ویلې، چې وسله والو طالبانو له څوو میاشتو راهیسې د ځمکې لاندې یو تونل کاږلی و.
دغې سرچینې وویل، دغه تونل یې د قومندان عبدالصبور د کور تر مخې پورې کیندلی و، چې د تونل له لارې یې د قومندان کور پر بمونو والوځاوه.
د سرچینې په قول په دې بمي چاودونو کې ۳ ښځې، ۲ ماشومان او د یاد قومندان ۶ساتونکي وژل شوي دي.
دا په داسې حال کې ده، چې له چاودونو سره سم په سیمه کې جګړه هم پېل شوې وه.
تر اوسه پورې کومې ډلې د پېښې مسولیت پر غاړه نه دی اخیستی.
وسله والو په هېواد کې څو وارې دغه شان بريدونه او تاکتيکونو کار اخیستي، چې له دې مخکې وسله والو طالبانو د کندهار له مرکزي زندان نه د کیندل شوي تونل له لارې بندیان تښتولي وو.
