د ملي شورا ځينې غړي وايي، د افغانستان د وردګ ولایت درې ولسوالۍ د وسله والو مخالفانو له قوي ګواښ سره مخ دي او که د افغان حکومت له لوري ورته جدي توجه ونه شي، نو کېدای شي چې دغه ولسوالۍ سقوط وکړي.
په ملي شورا کې د مېدان وردګو ولایت استازي وایي، د ورستیو ناامنیو له کبله د دغه ولایت درې جغتو، سېد اباد، او دايميرداد ولسوالۍ د وسله والو مخالفانو له سخت ګواښ سره مخ دي.
په مشرانو جرګه کې د میدان وردګو ولایت استازي حسیب الله کلیمزي د يوې غونډې پر مهال وویل، چې اوسمهال د میدان وردګو ولایت په نیمایي ولسوالیو کې دولتي کارکوونکي نه شته او ورځ تربلې د دغو سيمو اوسېدونکي له دولته واټن اخلي.
اخوا په ولسي جرګه کې د مېدان وردګو ولایت استازي عبدالمجید وردګ وايي، چې تر پخوا د مېدان وردګو امنیت خراب شوی او سلګونه کورنۍ د ناامنیو له کبله پلازمینې کابل ته کډه شوي دي.
د ملي شورا دغه غړي خبرداری ورکوي، که چیرې وردګو ته پام ونه شي نو لرې نه ده، چې د ناامنيو دغه کړۍ کابل په لوري هم پراخ شي.
بل خوا بیا د ملي دفاع وزارت د ویاند مرستيال دولت وزيري سلام وطندار ته ډاډ څرګند کړ، چې په جغتو، سېداباد او دایميرداد ولسوالیو کې د ملي اردو ځواکونه ځای پرځای شوي او هيڅکله به وسله وال مخالفین وران کاريو ته پرې نه ږدي.
د دغه ولایت نوي والي حیات الله حیات د کار په لمړي ورځ وردګ میشتو ته ډاډ ورکړ، چې د کار په لمړیو ورځو کې به امنیت، اداري فساد، دولتي ځمکو غصب په ولایتي اداره کې سمون او بدلون ته به ډيره پام کوي.
