د افغانستان د روڼتیا څار اداره وايي، چې د امنیتي ځواکونو په لیکه کې د جنګ سالارانو نفوذ، پراخ فساد او سیاسي لاس وهنې د امنیتي جوړښت د تیت پرک کېدو سبب کیږي.
د نړیوالې روڼتیا یا TI د نوې څېړنې پر بنسټ افغانستان د امنیت او دفاع په مدیریت کې په ټيټه سطحه کې دی.
د افغانستان د روڼتیا څار اداره د TI خپور شوي راپور ته په اشارې سره وویل، چې افغانستان د امنیتي بنسټونو د تدارکاتو په برخه کې د پام وړ پرمختګ لري، خو په دفاعي سکتور کې پراخ فساد د امنیتي ځواکونو مرال زیات ضعیف کړی دی.
د نړیوالې رونټیا په راپور کې راغلي دي، چې د افغانستان نظامي ځواکونه د دې په ځای چې د خلکو په خدمت کې وي، په دې مجبور دي، چې د سیمه ییزو جنګ سالارانو خدمت وکړي.
د افغانستان د روڼتیا څار بنسټ رییس سیداکرام افضلي په دې اړه په کابل کې جوړې شوې غونډې ته وویل، که د ملي یووالي حکومت د امنیتي ځواکونو په لیکو کې د جنګ سالارانو لاس غوڅ نه کړي په دغه بنسټ کې به لا فساد زیات شي.
افضلي وویل، هغه کسان چې د امنیتي ځواکونو په قراردادونو کې فساد کړی، هیڅ یو تر اوسه یې د فساد په تور عدلي او قضايي بنسټونو ته نه دي سپارل شوي.
دی وايي، چې نړیواله ټولنه دې افغانستان سره د امنیتي او دفاعي برخو کې مرسته وکړي او د ملي یووالي حکومت سره دې هر اړخیزه مرسته وکړي.
د ملي یووالي حکومت د لوړپوړو چارواکو نه ځواب وینه، په دولتي بنسټونو کې د پراخ فساد موجودیت سیاسي، مالي، عملیاتي او تدارکاتي برخې زیاتې زیانمنې کړي دي.
په ورته وخت کې د افغانستان ستراتیژیکو مطالعاتو بنسټ د پولیسو وضعیت په اړه یو څېړنه راپور خپور کړې ده.
په دغې څېړنه کې د افغان امنیتي ځواکونو په لیکو کې قوم پرستي، بې عدالتي، فساد او د خپلوي اړیکو پاللو ته اشاره وې او ویل شوي دي، چې دغو ستونزو پولیس له پښو غورځولي دي.
دا په داسې حال کې ده، چې څو ځلې د امنیتي ځواکونو په لیکو کې د قوم پرستۍ په اړه راپورنه خپاره شوي دي، خو په تازه ګۍ سره ملي دفاع وزارت او د کورنیو چارو وزارت په ګډې همغږۍ سره دغو ستونزو د حل له پاره په یو پلان کار کړی او ژمنه یې کړې، چې ژر په د امنیتي ځواکونو په لیکو کې پراخ بدلونونه رامنځته کړي.
