د غزني امنیه قوماندان جنرال امین الله امرخېل له سلام وطندار سره په مرکه کې وویل، چې نن (یکشنبې) ګهیځ ۷:۳۰ بجې یو ۳۰۳ ډوله مسافر وړونکی بس د تېلو له یو ټانکر سره د مقر ولسوالۍ د لرلم په سیمه کې مخامخ لګېدلی دی.
په دې پېښه کې په دواړو موټرو کې ۱۴ تنه وژل شوي او ۷۰ تنه ټپیان شوي دي.
د امرخېل په خبره، له ټکر وروسته د تېلو تانګر اور اخیستی او ځېنې سپرلۍ په اور کې سوځېدلي دي.
په ورته وخت کې د مقر سرپرست ولسوال وحیدالله وايي، چې په دواړو موټرو کې ۱۱۰ تنه سپاره وو، چې د اټکل له مخې په دې پېښه کې ۵۰ تنه وژل شوي دي او ۶۰ تنه نور ټپیان دي.
د وحیدالله په وینا، ښايي د ټپیانو او وژل شویو شمېر زیات شي. او زیاتوي، چې د پېښې سیمې ته پولیس ورسېدلي دي.
د غزني ولایتي روغتون یو تن کارکوونکی صفی الله وايي، چې تر اوسه پورې د پېښې له سیمې ۲۰ تنه ټپیان روغتون ته ور وړل شوي دي.
دی وايي، چې د ټپیانو حالت ډاډمن نه دی او ټپي شوي کسان سخت سوځېدلي دي.
صفي وویل، چې سوځېدلي کسان به ډېر ژر مرکز کابل ته ولېږدوي.
