په پنجشېر کې محلي سرچینې وايي، کومانډویانو بېګاه د دغه ولایت د مرکز اړوند په سنګانه سیمه کې د فوټبال فدراسیون د مخکیني رییس کرامالدین کریم پر کور برید کړی دی. دغه عملیات بېپایلې پای ته رسېدلي او هغه یې نه دی نیولی.
سرچینه وايي چې د دغو عملیاتو په اړه ورسره همغږي نه وه شوې.
د پنجشېر د ولایتي شورا مرستیاله راحله عطايي بیا د کرامالدین کریم پر کور عملیات حللاره نه بولي او وايي، امنیتي ځواکونو باید له نورو لارو د نوموړي د نیولو اقدام کړی وای.
د کریم د کورنۍ غړیو سلاموطندار ته ویلي چې یاد نظامي عملیات د دوی په منځ کې وېره او تاوتریخوالی خپور کړی او د ډزو پر مهال ځینې ملکیان ټپیان شوي دي.
تر اوسه د پنجشېر لویه لاره د تګراتګ پر مخ تړلې ده.
د کرامالدین کریم پر کور نظامي عملیات د دغه ولایت د یوشمېر اوسېدونکو غبرګونونه راپارولي دي.
د دغه ولایت محلي مسوولان وايي چې په دې اړه به نن یوه غونډه جوړه کړي.
د فوټبال فدراسیون مخکینی رییس کرامالدین کریم تېر کال د فوټبال لوبډلې د پنځو غړیو د جنسي ځور په جرم د تل لپاره د فوټبال او سپورټي فعالیتونو بېبرخې شو.
د یادونې چې ولسمشر محمداشرف غني د سږ کال زمري میاشتې په اوومه نېټه په یوه غونډه کې د ملي مصالحې شورا له رییس عبدالله عبدالله او د پنجشېر له خلکو غوښتي وو چې هغه له خپل ولایته راوباسي.
