نن سهار د کابل ښار څلورمې امنیتي حوزې اړوند د تایمني مخکنۍ څلور لارې کې چاودنه رامنځته شوه. د ولسمشرۍ د لومړي مرستیال امرالله صالح مطبوعاتي دفتر وايي، د دې چاودنې موخه د ولسمشرۍ ریاست د لومړي مرستیال امرالله صالح موټریز کاروان و.
د ولسمشرۍ مرستیال امرالله صالح په یوه ویډیويي پیغام کې ویلي چې له دې پېښې روغ وتلی او لږ زیانمن شوی دی.
دا چاودنه په داسې حال کې کېږي چې هېواد د بین الافغاني مذاکراتو د پیل لپاره چمتوالی نیولی دی؛ خو د راپورونو پربنسټ ناامنۍ، هدفي وژنې او وسلهوال بریدونه زیات شوي دي.
شاوخوا یوه میاشت وړاندې د افغانستان حکومت د سولې د مرکهچي پلاوي غړې فوزیه کوفي هم د کابل قرهباغ ولسوالۍ کې تر وسلهوال برید لاندې راغله او برسېرنه ټپي شوه.
د ولسمشرۍ ریاست لومړي مرستیال امرالله صالح تېره ورځ د احمدشاه مسعود د ترور ۱۹ تلین کې د وينا پر مهال ویلي و چې طالبان دې درک کړي چې سوله د دوی غوښتنو ته د تسلیمېدو په معنا نه ده.
د امرالله صالح په موټریز کاروان برید، غبرګونونه هم راپارولي دي.
ارګ په خپره کړې اعلامیه کې ویلي، ترهګر او د دوی بهرني ملاتړي د دې ډول جنایت په ترسره کولو سره نه شي کولای سوله او جمهوریت چې د خلکو اساسي غوښتنه ده، ضعيف کړي. د ارګ په اعلامیه کې راغلي چې د ترهګرو پر وړاندې د امنیتي ځواکونو مبارزه به دوام ولري.
د مصالحې عالي شورا رییس عبدالله عبدالله د یوې اعلامیې په خپرولو سره د ولسمشرۍ ریاست په لومړي مرستیال برید غندلی او ویلي يې دي چې دا برید په داسې حال کې چې هېواد د بینالافغاني خبرو اترو د پیل په حال کې دی او د افغانستان خلک د جګړې او وینې تويېدنې د بندېدو غوښتنه کوي، ښيي چې د سولې پيدا او پټ دښمنان د سولې د تامین غوښتونکي نه دي.
عبدالله له اړونده ادارو غوښتي چې د امرالله صالح په موټریز کاروان برید په جدي توګه وڅېړي.
د ولسمشرۍ ریاست دویم مرستیال سرور دانش هم د ولسمشرۍ ریاست په لومړي مرستیال تروریستي برید د سولې برنامې صریح نقض بللی دی.
د ولسي جرګې رییس میررحمان رحماني نن د دې جرګې په عمومي غونډه کې د امرالله صالح په موټریز کاروان برید چې له کبله یې ملکي وګړو ته مرګ ژوبله اوښتې، غندلی دی.
رحماني وايي، د افغانستان د خلکو دښمنان د ترهګرو ډلو په ملاتړ هڅه کوي چې د بینالافغاني خبرو اترو د پیل پر وړاندې تشه رامنځته کړي.
په افغانستان کې د شمالي اتلانتیک تړون سازمان یا ناټو، اروپايي ټولنې، د ملي امنيت شورا سلاکار حمدالله محب، په افغانستان کې د امریکا سفارت او پاکستان هم دا برید غندلی دی.
د کورنیو چارو وزارت د یوې اعلامیې په خپرولو سره وايي، د دوی د موندنو پر بنسټ دا برید په یوه کراچۍ کې د ځای پرځای شویو چاودېدونکو توکو له کبله شوی دی.
د کورنیو چارو وزارت ویاند طارق ارین وايي، په دې برید کې ۱۰کسان وژل شوي او د امرالله صالح د ساتونکو په ګډون ۱۵کسان ټپیان شوي.
د پېښې شاهدان وايي، دا چاودنه د سړک ترغاړې د اېښودل شوي ماین له کبله وه چې د ګاز ډبو د چاودنې لامل هم شوه.
د ولسمشرۍ ریاست د لومړي مرستیال امرالله صالح پر موټریز کاروان برید چا یا کومې ډلې پر غاړه نه دی اخیستی.
طالبانو هم په دې چاودنه کې خپل لاس لرل رد کړي دي.
