د اطلاعاتو او کلتور وزارت د هنر نړېوالې ورځې په مناسبت د هنرمندانو د لمس وړ اسنادو ساتلو لهپاره د پروان ولایت اطلاعاتو او کلتور ریاست په چوکاټ کې د «هنرستان پروان» په نوم نوی تشکیل زیات او نن په رسمي ډول پرانستل شو.
د یاد ریاست مسوولان د یادې برخې پرانستل د هنري فعالیتونو زیاتوالي لهپاره ګټور بولي او وايي، هڅه کوي چې پروان کې د هنري فعالیتونو لهپاره لازمې اسانتیاوې برابرې کړي.
د پروان د اطلاعاتو او کلتور ریاست رییس عبدالواحد هاشمي وايي، په یاد هنرستان کې یې د پروان په ګډون، د بامیان، کابل او میدان وردګ ولایتونو د هنرمندانو اثار نندارې ته اېښي دي.
د نوموړي په وینا، په دغه هنرستان کې به د تل لهپاره ۴۰ هنري اثار نندارې ته اېښي وي او مینهوال کولی شي په وړیا ډول یې وګوري.
په همدې حال کې د پروان یوشمېر هنرمندان او اوسېدونکي د «هنرستان پروان» په نوم د نوې برخې جوړولو هرکلی کوي او وايي، دا ډول فرصتونه د وړتیاوو او د ځوانانو له لوري د هنري او فرهنګي فعالیتونو د ښودلو برخې کې اغېزمن رول لوبولی شي.
د پروان دوه مېناتورانې ذکیه پیرزاد او هدیه اخلاص وايي، د هنر او فرهنګ پیاوړتیا برخې کې دا ډول اقدامات کولی شي، ځاني وړتیاوې په عملي هغو بدلې او لیدلوري هم په واقعي او عملي بڼه واړوي.
پروان د کابل په شمال کې د متمدنو ولایتونو له ډلې یو دی چې د لرغونې دورې، په ځانګړي ډول د کوشانیانو او یونانیانو دورو ډېر فرهنګي میراثونه پهکې پاتې دي.
