ولسي جرګې ته د پروان ولایت یو نوماند میررحمان رحماني وايي، ناپېژنده وسلهوالو یې د کمپاین تبلیغاتي پاڼې شکولي او کمپاینران یې هم ګواښلي دي.
د نوموړي په وینا، ۳ ناپېژندو وسلهوالو چې په یوه کرولا ډوله موټر کې سپاره وو، نن له غرمې مخکې د دې ولایت جبلالسراج ولسوالۍ اړوند سیمه کې د ده د کمپاین مخه ونیوله او کمپاینران یې هم وګواښل.
رحماني زیاتوي، موضوع یې د سیمې له امنیتي ځواکونو سره شریکه کړې او هغوی هم منلې چې ناپېژندو کسانو د ده د کمپاین مخه نیولې ده. د رحماني په وینا، یوشمېر کسان خلکو ته پیسې ورکوي چې د ده د کمپاین مخه ونیسي.
په همدې حال کې د پروان ټاکنیزو شکایتونو کمېسیون ولایتي دفتر د څارنې او ارزونې مسوول رحیم ابراهیمي وايي، تراوسه ورته پهدې اړه شکایت شوی نهدی، خو په وینا یې که ورته شکایت وشي، دوی به یاده موضوع چې د ټاکنو قانون له مخې ټاکنیزه تخطي ده، وڅېړي.
د ټاکنو کمېسیون د تېرې جمعې په ورځ نوماندانو ته د ټاکنیز کمپاین کولو رسمي اجازه ورکړه او نوماندانوو هم په خپلو ولایتونو او سیمو کې خپلې ټاکنیزې مبارزې پیل کړې. نوماندان باید خپل ټاکنیز کمپاینونه د ټاکنو قانون او نورو نافذه قوانینو له مخې او د ټاکنیزو اصولو په پام کې نیولو سره وشي.
