په دې وروستیو کې یوې بهرنۍ رسنۍ د طالبانو د یوې مهمې سرچینې له خولې راپور ورکړی چې د طالبانو مشر ملاهبتالله اخندزاده د مولوي امیرخان متقي په ګډون، د قطر سیاسي دفتر اته غړي له دندو ګوښه کړي او له خپلې خوا یې څلور نور کسان دغه دفتر ته استولي دي.
دغه راز په نظامي برخه کې هم د پخواني قوماندان ملا ابراهیم صدر پر ځای د طالبانو د پخواني مشر ملامحمدعمر زوی ملا یعقوب د دغې ډلې د نظامي کمېسیون مشر ټاکل شوی دی.
که څه هم په طالب ډله کې بدلون را بدلون یوه معمول خبره ده او د دې ډلې مشرتابه ځینې وخت سیاسي او نظامي چارواکي بدلوي، خو له قطر نه د سیاسي دفتر د غړیو اېستل او پر ځای یې د نورو کسانو ګومارل او دغه راز د نظامي کمېسیون په مشرتابه کې د ملا عمر د زوی ګومارنه، هغه څه دي چې د سولې خبرواترو په درشل کې یې د طالبانو د غړیو ترمنځ ګنګوسې راپورته کړې دي.
د نظامي چارو یوشمېر کاپوهان وايي، په داسې یوه حساسه مرحله کې چې ټاکل شوې راتلونکو څو ورځو کې د افغانانو ترمنځ د سولې خبرې اترې پیل شي، دغه بدلونونه د افغانستان لپاره ښه زېری نه دی.
د نظامي او استخباراتي چارو کارپوه محمد حیدري او د کورنیو چارو وزارت پخوانی مرستیال میرزامحمد یارمند وايي، د پاکستان استخبارات غواړي د سولې خبرواترو په درشل کې خپل نفوذي کسان د دې ډلې په مشرتابه کې وګوماري، څو ښه یې مدیریت کړای شي.
د دوی په وینا، د طالب ډلې په نظامي برخه او مرکچي پلاوي کې دغه بدلون رابدلون د هبتالله له خوا نه، بلکې د پاکستان له لوري کېږي، څو غوره شوي کسان بینالافغاني خبرې اترې د پاکستان په ګټه راوڅرخوي.
ومو غوښتل چې په دې اړه په قطر کې د طالبانو د سیاسي دفتر او دغه راز د سولې په چارو کې د دولت وزارت نظر هم له ځانه سره ولرو، خو له ډېرو اړیکو سره سره بریالي نه شوو.
د ویلو ده چې په طالب ډله کې د نظامي او سیاسي چارواکو بدلول او له دندو ګوښه کول له دې وړاندې هم شوي دي.
د طالبانو مشر او بنسټ اېښودونکي هم د خپل حکومت په دوره کې ملا دادالله اخوند له اصولو نه د سرغړونې او د هېواد په شمالي ولایتونو کې د وهلو ټکولو په جرم له دندې لرې او سلګونه نور کسان یې هم بېوسلې کړي وو.
