کینگشی‌نینگ بیرقطار اعضاسی، دوشنبه کونی فوق‌العاده ییغینی‌ده، تینچ‌لیک لایحه‌سی توغری‌سیده خواطر بیلدیریب و اونی ناکام دیگنلر.
پارلمان اعضالریدن بیری قیوم سجادی، تینچ‌لیک مذاکره‌سیدن تنقیدقیلیب ایتیشیچه، حکومت، منطقه مملکت‌لری بیلن تینچ‌لیک مذاکره توغری‌سیده بیللی برنامه قولگه آلیشی لازم.
اونینگ ایتیشیچه، سنگرلرده قان بیریب مملکت‌دن دفاع قیله‌دیگن‌لرگه قره‌ب توریش ییچیم یول ایمس دیر، و ملی بیرلیک حکومتی برنامه‌لری‌گه منطقه مملکت‌لری بیلن قیته کوریش کیره‌ک.
پارلمان‌نینگ باشقه بیر اعضاسی محمد عبده‌نینگ ایتیشیچه، افغانستان فایده و زیانی‌نی کوزگه توتمه‌ی، باشقه مملکت‌لر بیلن امنیتی و دفاعی شرط‌نامه لریگه قول قویگن، بیراق بو شرط‌نامه‌لر افغانستان‌ده هیچ بیر قیینچی‌لیک‌نی حل ایته آلمه‌گن.
جناب عبده‌گه کوره، طالب‌لر حاضرگه قدر بیللی آدرس‌دن افغانستان حکومتی بیلن مذاکره قیلمه‌گن و تینچ‌لیک سوزلشوولری اورته گه چیقگندن بویان، ناتینچ‌لیک‌لر هم کوپیگن.
جناب عبده‌نینگ کوپه‌یتیریشیچه، ایریم مملکت‌لرده طالب‌لر بیلن اوتکزیلگن سونگی اولتیریش‌لر نتیجه بیرمه‌گن و حکومت بوندن آرتیق دولت‌گه قرشی قوراللی عصیانچی‌لرگه اهمیت بیرمس‌لیگی کیره‌ک. او، افغانستان تینچ‌لیک یوکسک کینگشی لغو ایتیلیشینی سوره‌گن.
بیراق، تشقی ایشلر وزیرلیگی‌نینگ سوزلاوچی‌سی احمدشکیب مستغنی‌نینگ ایتیشیچه، طالب‌لر بیلن ناروی‌ده اوتکزیلگن مذاکره‌ده، تینچ‌لیک لایحه‌سی اوستیگه هم بحث اوتکزیلگن.
اونگه کوره، افغانستان نماینده لیگی‌دن اجراییه ریاستی ایکینچی اورین باسری محمد محقق و تشقی ایشلر وزیرلیگی سیاسی اورین باسری حکمت‌خلیل کرزی حضور تاپیب و نارسمی صورتده تینچ‌لیک توغری‌سیده بحث اوتکزگنلر.
عین حالده، اجراییه ریاستی بیرینچی اورین باسری انجنیر محمدخان‌نینگ کابل‌ده اوتکزیلگن ییغین‌ده ایتیشیچه، افغانستان عصیانچی‌لر بیلن کوره‌شیش شرایطی‌ده قرار تاپگن و افغانستان‌دن حمایت ایتیلمه‌گن صورتده، بو اوروش افغانستان چیگره‌لریدن تشقری چیقیشی ممکن.
بوندن آلدین نارسمی تینچ‌لیک اولتیریش‌لری، دبی، ناروی، قطر، چین و باشقه بیرقطار مملکت‌لرده اوتکزیلگن ایدی.
دیمک ملی کینگش و تینچ‌لیک یوکسک کینگش بیرقطار اعضاسی، نارسمی تینچ‌لیک اولتیریش لرینی ایجابی بیلمه‌یدیلر؛ بیراق اولردن بیرقطاری‌گه کوره، بونقه اولتیریش‌لر رسمی سوزلشوولر اوچون زمینه یره ته‌دی.
دوشنبه کونگی هجوم توغریسی‌ده‌گی قرشی‌لیک‌لر
پارلمان اعضاسی‌دن بیرقطاری، ملی کینگش بناسی‌گه طالب‌لرنینگ دوشنبه کونگی اویوشتیرگن هجومی گه قرشی ایتیشیچه، امنیتی مسؤول‌لردن بیرقطاری‌نینگ مذکورهجوم‌گه قولی بار. بو نماینده‌لر مجلس‌نی سه‌شنبه کونگی ییغینی‌ده ملی کینگش‌گه اویوشتیریلگن هجوم توغری‌سیده جدی صورتده قرشی‌لیک کورستدی.
دوشنبه کونی جنگری طالب‌لر، جمهور رییس ایکینچی اورین باسری سروردانش و ملی مدافعه وزیرلیگی نامزد وزیری معصوم استانکزی‌لرنی پارلمان‌گه کیله دیگن بیرچاغده، ملی کینگش بناسی‌گه هجوم اویوشتیردی.
گزارشلرگه کوره، بیرینچیدن بیرخودکش هجومچی پارتلاوچی ماده دن توله بولگن موترنی پارلمان بناسی اونگیده پارتلتگن و اوندن کیین باشقه هجوم چیلر اوق آتیش‌گه باشله گن.
ایتیلیشیچه، بو هجوم‌ده بیر عیال و بیر باله هلاک بولگن و باشقه عیال‌لر و باله‌لر شامل 31 کیشی یره‌لنگن.
پارلمان بیرقطار اعضاسی‌نینگ ایتیشیچه، طالب‌لرنی دوشنبه کونگی هجومی و اونگه ایش آلینگن تاکتیک‌لر ایچکریدن همکارلیک قیلینگنینی کورسته‌دی.
اولرنینگ ایتیشیچه، پارلمان‌گه کیریش اوچون طالب‌لر ایش آلگن یول، حاضرگه قدر مجلس نماینده‌لری‌گه بیللی ایمس ایکن. شونینگ‌دیک اولرنینگ ایتیشیچه، قورال ذخیره‌سی‌گه اویوشتیریلگن هجوم مهارت بیلن ریجه‌لنگنینی کورسته‌دی.
عین حالده، پارلمان اعضاسی‌دن بیرقطاری، ملی کینگش بناسی‌گه طالب لرنینگ دوشنبه کونگی هجومی توغری سیده امنیتی مسؤول‌لرنی عیب‌لگنلر.
اولر، مملکت ملی امنیت باشلیغی و ایچکی ایشلر وزیری‌نینگ استیضاح بولیشینی سوره‌گن؛ بیراق باشقه بیرقطار نماینده‌لر اولرنینگ بو ایسته‌گی‌گه قرشی‌لیک کورستیب و ایتیشلریچه، حاضرگی شرایط‌ده ملی امنیت باشلیغی و ایچکی ایشلر وزیری‌نینگ استیضاح ایتیلیشی قیینچی‌لیک‌نی کوپه‌یتیره‌دی.
