فراه ولایتی کینگش اعضالریدن جمیله امینینینگ سلاموطندارگه ایتشیچه، اوتگن آقشام طالبان گروهی فراه شهری و پشت رود تومنی اوستیگه هجوم قیلگنلر.
خانیم امینیگه کوره، فراه شهریدهگی هجومده 7پولیس اولگن و ایکی پولیس هم تن جراحتی آلگن و پشت رود تومنیدهگی هجومده ایسه بیر پولیس اولیب پوسته قومندانلریدن بیر داخل 4کیشی یرهلنگن.
امینی و فراه بیرقطار مدنی فعاللرینینگ ایتیشیچه، ایکی آیدن بیری فراه شهری طالبان قملیده قالگن و بوگروه هر کیچه پولیس پوستهلریگه هجوم قیلیب عسکرلرنی اولدیرهدی؛ بیراق دولت بوحقده هیچ قندهی توجه قیلمهگن.
انهشوحالده فراه والیسینینگ اورین باسری محمد یونس رسولینینگ ایتیشیچه، حاضر فراه شهرینینگ شمال، جنوب، شرق و غرب ایشیکلری طالبان قملیده و هرکیچه 10 – 15 عسکر هلاک ایتیلهدی.
رسولی اولر نیچه قتله مرکزی مسؤوللر بیلن بو قینچیلیکنی اورتهگه قویگنینی ایتیب، بیراق هیچ قندهی توجه بولمهگنینی ایتماقده.
فراه مدنی فعاللریدن جواد تابش فراه شهری قملیدن خواطربیلدیریب، امنیتی کوچلرگه یتهیاتگن هلاکتلر و طالبان هجومی ولایت مقامینینگ 2کیلومترلیگیده بولگنینی ایتهدی.
بوحقده فراه امنیتی ملازملری بیلن هم صحبت قیلیشگه اوریندیک اما موفق بولمهدیک.
ایچکی ایشلروزیرلیگی سوزچیسینینگ اورین باسری نصرت رحیمی فراه شهری آلینگنلیگینی رد قیلیب، فراه تازهلنیشی اوچون ریجهلری بارلیگینی ایتهدی.
