د کابل ښار ټکسي موټر چلوونکي شکایت کوي، چې ترافیک یې زوروي او د کاري فرصت مخه یې نیسي.
دغه ټکسي چلوونکي وايي، چې د کابل ښار په هیڅ سیمه کې د ټکسي او لیني موټرونو له پاره تم ځای نشته دی او کله چې په څلور لارو کې سپرلۍ موټرو ته پورته کوي، ترافیک یې زوروي.
موتر چلوونکي وايي، چې ترافیک د دوی موټر په لغتو او برېښنايي ډنډو وهي همدا ډول زیاتوي، چې موټر یې پنجروي او د نقدي جریمه کوي یې.
د دغو موټرو چلوونکو یو تن د نوم نه اخیستلو په شرط سلام وطندار سره په مرکه کې وویل، ځېنې وخت ترافیک ورته وايي، د دې پر ځای چې حکومت ته د جریمې ۳۰۰ افغانۍ تحویل کړي، دوی ته ۱۵۰ افغانۍ ورکړي، له جریمې ژغورل کېږي.
همدا ډول ځېنې ټکسي چلوونکي وايي، چې ځېنې وخت ترافیک دوی ته د جریمې جعلي پارچې ورکوي او دغه پیسې شخصي جیبونو ته ورځي.
د افغانستان د جریمې سیستم بانکی شوی نه دی او موټر چلوونکي باید مخامخ ترافیکو ته د جریمې پیسې ورکړي.
د کابل د ترافیکو عمومي مدیر جنرال اسدالله وايي، چې د کابل ښار د ترافیکو په لیکو کې ستونزې شته دي.
خو نوموړی د جریمې د جعلي پاڼو موجودیت ردوي او وايي، چې د دغو ستونزو د حل له پاره په ښار کې یې د ترافیکو پر تبدیل کار پیل کړی دی.
د کابل د ترافیکو مدیر هم وايي، چې ترافیکي پولیس له ښاریانو او موټروانانو سره د ناسم چلن او جنجال حق نه لري، خو دوی باید سړکونه، څلورلارې او له ګڼې ګوڼې نه په ډکو ځایونو کې ونه درېږي. په همدې دلیل هغوی ته د جریمې پارچې ورکول کېږي، چې بیا ځلي په څلور لارو کې ونه درېږي.
سره له دې چې د افغانستان ترافیک یوه پېړه مخینه لري؛ خو تر اوسه کابل د یوې پلازمېنې په توګه د حمل و نقل سیستم او د یو معیاري ښار کانالیزاسیون نه لري. د کابل ښار تر دامهال ښاري تمځایونه نه لري او تر څنګ یې ډېر سړکونه او لارې یې د زورواکیو، چارواکیو او دولتي ادارو له خوا بندې شوې دي.
