د دغه هېواد په پلازمېنه پیکنګ کې د چین د بهرنیو چارو د وزارت ویاند هووا چونیانګ خبریالانو ته دسه شنبې په ورځ وویل، چین به یو شمیر پروژې په افغانستان کې تطبیق کړي ،چې په دغو کې د کونړ ولایت د بریښنا د بند جوړیدل هم شامل دي.
تېره ورځ د پاکستان د باندنیو چارو مرستیال وزیر عزیز احمد چوهدري، د افغانستان د بهرنیو چارو مرستیال وزیر حکمت خلیل کرزي او د چین د بهرنیو چارو مرستیال وزیر ترمنځ غونډه وشوه، چې د غونډې اصلي هدف په سیمه کې د سولې او ثبات په موخه درې اړخيزې همکارۍ وې.
په همدې حال کې چین ژمنه وکړه، چې هیواد به یې د افغانستان په ختیځ کې د اوبو بند او د بریښنا فابریکه جوړه کړي.
د راپورونو پر بنسټ د افغانستان په ختيځ ولایت کونړ کې د ۱۵۰۰ میګاواټه په ظرفیت د بریښنا د تولید د فابریکې ملاتړ اسلام اباد کړی او ویلي یې دي، چې د دغې فابريکي يوه اندازه توليد شوی برېښنا به له افغانستان څخه هم اخلي.
کونړ هغه ولایت دی، چې د افغانستان پر پوله پروت دی او ډیری وخت ځينې ولسوالیو کې ناامني وي، چې د دغو ولسوالیو څخه دانګام، شیګل او ناړۍ يادولی شو، خو رویټرز خبري اژانس بيا وايي، چې په کونړ کې به د چین له هڅو سره دغه هیواد پر نورو هغو پروژو چې پخوا یې ژمنې کړې وې کار پېل شي.
رويټرز خبري اژانس د دغو پروژو یوه نمونه په لوګر کې د مسو د عینکو کان یاد کړی دی.
تراوسه دا جوته نه ده، چې چین به د افغانستان په ختيځ ولایت کونړ کې د بریښنا پر فابریکې او د اوبو پر بند څومره لګښت کوي، خو د افغانستان د بهرنیو چارو د وزارت مرستیال ویاند سراج الحق سراج وویل، چې د دغو پروژو د لګښت په اړه به د درې واړو هیوادونو تر منځ په راتلونکو غونډو کې پریکړه وشي.
د چين، افغانستان او پاکستان ترمنځ به راتلونکی بله درې اړخيزه ناسته د راونې فبرورې میاشتې په ۱۲ نېټه په اسلام کې وشي.
د افغانستان د اقتصاد وزارت مرستيال شیر محمد جامعزاده سلام وطندار ته و ویل؛ چې د کونړ پر سیند د بريښنا بند جوړول به د افغانستان اقتصاد را ژوندی کړي، ځکه د نوموړي په وينا افغانستان اوسمهال د نورو هېوادونو څخه برق اخلي او خپله توليدي بريښنا نه لري.
شیرمحمد جامع وايي؛ د کونړ سیند د اوبو بند به افغانستان د ځان بسیا پر لور یو لوی ګام وي او په دغه سره به د افغانستان لويې فابريکې هم د ارزانې برښينا خاوند شي.
د افغانستان د اقتصاد وزارت مرستیال د چين له دغه اقدام څخه هر کلی کوي او وايي، چې د چين دغه کړنه به د افغانستان لپاره دوامداره اقتصادي ګټه وي.
دا مهال له شمالي گاونډي هېوادونو ازبکستان او تاجکستان څخه بريښنا افغانستان ته اخيستل شوې ده او همدا اوس کابل ولايت د ازبکستان لسګونه ميګاواټه برښنيا څخه ګټه اخلي په داسې حال کې، چې افغانستان د اوبو د منابعو پراخې زېرمې لري .
