د افغانستان د ټاکنو خپلواک کمېسيون مشر وايي؛ د ټاکنو په کمېسیون کې د اصلاحاتو په نوم به د هرډول لاسوهنو په باب جدي وي او هيڅ راز غير قانوني کړنو په مقابل کې به چوپه خوله پاتې نه شي.
دچهار شنبې په ورځ( دسلواغې پر ۱۵مه) د ټاکنو خپلواک کمېسیون مشر احمد یوسف نورستاني د خپلې دندې څخه د ګوښه کېدو په باب و ویل، چې دی به له خپلې دندې لري نه شي او د ملي وحدت اوسني حکومت دواړو مشرانو ته د خپلې دندې د شفافیت ورکولو په باب پوره چمتو والی لري.
نورستاني زياته کړه، چې دی استعفا نه کوي، خو په تېرو ۱۳۹۳ کال ولسمشريزو ټاکنو کې د هرې موضوع له پاره د حساب ورکولو ډاډ ورکولای شي.
" حاضر نه یم، چې په زور او غير قانوني توګه د ټاکنو کميسیون له ریاست څخه استعفا وکړم"
نورستاني وايې د اصلاحاتو په نوم به د ټاکنو په کمېسيون کې د سياسي کړيو د کسانو له مقرېدو مخنيوي وکړي.
د ټاکنیزو شکایتونو خپلواک کمېسيون هم د ټاکنیزو اصلاحاتو په نوم پېل شوې هڅې ددوي په چارو کې لاس وهنه بولي او زیاتوي، چې کورنۍ او بهرنۍ کړۍ دې له لاس وهنې ډډه وکړي.
ددغه کمېسيون د دارالانشامرستیال ولید اکبر سروري افغانستان کې د اروپايي ټولنې د استازي څرګندونې غندلي او هغه یې ددوي په چارو کې لاس وهنه بللې ده.
په دې اړه د ولسمشر او اجرايوي مشر مرستیالان هم ورته څرګندونې کړې وې.
د ولسمشر دویم مرستيال محمد سرور دانش ويلي، د دوی ټيم اوس هم په خپلو ژمنو ولاړ دی او په ټاکنو کې د اصلاحاتو غوښتونکي دي.
همدارنګه د اجرايوي مشر دویم مرستيال محمد محقق هم زیاته کړې، چې دوی د ولسمشر محمد اشرف غني سره خبرې کړي او په دې باب د يو ګډ کمېسيون په جوړېدا سره سلا شوي دي.
تېر ۱۳۹۳ کال ولسمشريزې ټاکنې د ځينو ملحوظاتو له امله په دویم پړاو کې د ناورین پر لور لاړې او بیا وروسته له څو میاشتو ناندریو د امريکا د بهرنيو چارو وزير جان کري په منځګړيتوب کړکېچ ته پاې ته ورسېد او دواړو مشرانو د ملي وحدت حکومت د جوړېدو په باب هوکړه وکړه.
اجرایوي ریاست دغه سمون له پارلماني ټاکنو وړاندې راوستل غواړي خو ولسمشر بیا ددې اصلاحاتو له پاره د یو مناسب وخت په لټه کې دی.
د پارلماني ټاکنو په اړه نورستاني ويلي، چې په دې اړه يې د ټاکنو خپلواک کمېسيون وړانديزونه ولسمشر ته استول شوي دي، خو د کره نېټې په باب يې څه نه دي ویلي.
اخوا د ټولنیز عدالت د خونديتوب خوځښت هم د ټاکنو په کمېسيونونو کې د اصلاحاتو غوښتونکي دي.
د دغه مدني خوځښت بنسټ اېښودونکودسلواغې بر ۱۶مه پنجشنبه د يوې خبري ناستې به ترڅ کې و ویل، حکومت باید د خپلو کړو ژمنو مطابق په کمېسيونونو کې بنسټيز اصلاحات را منځ ته کړي.
دغه بنسټ خبرداری ورکړ، که د ملي وحدت حکومت د ټاکنو په کمېسيونونو کې اصلاحات را منځ ته نه کړي خلک به په راتلونکي پارلماني ټاکنو کې ګډون ونه کړي.
ددې بنسټ غړي احمد ذکي د اروپايي ټولنې او ملګرو ملتونو له سازمان څخه هم غوښتنه وکړه، چې په ټاکنيزو کمېسيونونو کې د اصلاحاتو له پاره د ملي وحدت پر حکومت خپل فشارونه زیات کړي.
ډاکټر عبدالله عبدالله هم په غير مستقيم ډول د ټاکنو خپلواک کمېسیون مشر احمد یوسف نورستاني ته خبر داری ورکړ، چې د ملي وحدت حکومت د جوړېدو یو اساسي بنياد په ټاکنو کې د اصلاحاتو راوستل دي او دا حتمي موضوع ده.
په همدې حال کې حقوق پوهان وايي پرته د درې ګونو محکمو له پرېکړې د ټاکنو دخپلواک کمېسيون غړي لرې کول د قانون تر پخو لاندې کول دي.
بل لورې ځينې شنونکي د ۱۳۹۳ کال د ولسمشریزو ټاکنو پړه یواځې پر کمېسيون نه ور اچوي؛ بلکې ټاکنیزې دلې هم په کې ککړې بولي.
یاده دې وي، چې د ټاکنو له پروسې سره ځينې مرستندويو بنسټونو بهرني چارواکي په ټاکنو کې له اوسني تشکيلاتو انديښنه څرګنده کړې او د راتلونکو مرستو د قطع کېدو د احتمال ګواښونه هم کړي.
