له غور ولایت څخه را رسېدلي راپورونه وايي، چې په دغه ولایت کې يوه ځوانه ښځه له جنسي تېري وروسته په صحرايي محکمه کې د وسله والو طالبانو له لوري په ډزو و وژل شوه.
د غور د والي ویاند عبدالحي خطیبي سلام وطندار ته وویل، چې د ایوب په نوم یو سړي د زهرا نومې ښځې کور ته ورځي او پرې جنسي تېری کوي.
خطیبي وايي، وروسته له هغه، چې وسله وال طالبان د دغې پېښې څخه خبريږي، نو د زهرا پسې د غور ولایت دولينه ولسوالۍ "زادو" کلي ته ورځي او په ډزو يې وژني.
د والي ویاند وايي، چې پر دغې ښځې تجاوز کوونکی په ټپي حالت کې د طالبانو له منګلو پر تېښتې بريالی کيږي، خو وروسته بیا د بل طالب قومندان لاس ته ورځي.
د راپورونو پر بنسټ تر اوسه دغه سړی د وسله والو طالبانو سره بندي دی او احتمال لري، چې څو ورځې وروسته هغه هم د طالبانو له لوري په یوه صحرايي محکمه کې اعدام شي.
یاده دې وي، چې دغه پېښه د غور ولایت په یوه داسې ناامنه سيمه کې شوې، چې د افغان ځواکونو په ولکه کې نه ده.
