په کندوز کې یوې امنیتي سرچینې سلاموطندار ته وویل، دوه امریکايي سرتېري نن په دغه ولایت کې د ناټو ځواکونو په ملاتړ د افغان ځانګړیو ځواکونو د عملیاتو پر مهال ووژل شول.
د سرچینې په وینا، په یادو عملیاتو کې چې له تېرې ورځې راهیسې د کندوز په «تلوکه» سیمه کې روان دي، یو بل امریکايي سرتېری ټپي شوی هم دی.
په همدې حال کې په افغانستان کې د امریکا متحده ایالاتو پوځ نن د یوې خبرپاڼې په خپرولو سره د دوو امریکايي سرتېرو وژل کېدل منلي، خو د پېښې ځای په اړه یې معلومات نهدي ورکړي.
بلهخوا په کندوز کې د کومانډو ځواکونو د لسم کنډک قوماندان محمدعلي احمدي سلاموطندار ته وویل چې د یادو عملیاتو پر مهال په تلوکه سیمه کې ۳۰ طالبان چې ۱۵ یې د سرې قطعې غړي دي، وژل شوي او یو شمېر نور هم ټپیان دي.
اړوند مطالب:
«خالد» پوځي عملیات؛ په نوروز کې به امنیتي وضعیت ښه وي
پوځي عملیات؛ د طالبانو پوځي مرکز، زندان او د وسلو زېرمتون ویجاړېدل
د احمدي په وینا، تر اوسه په یادو عملیاتو کې د طالبانو څو قرارګاوې له منځه تللي او اوس هم د افغان ځواکونو او طالبانو ترمنځ په تلوکه سیمه کې سخته جګړه روانه ده.
طالبانو تر اوسه د خپلو کسانو د وژل کېدو په اړه رسنیو ته څه نهدي ویلي.
په افغانستان کې د تېرو اتلسو کلونو د جګړې پر مهال له ۲۴۰۰ نه ډېر امریکايي نظامیان وژل شوي دي.
اوس نږدې ۱۴ زره امریکايي ځواکونه د ناټو ماموریت په چوکاټ په افغانستان کې دي.
