تيره ورځ د رسنیو له خوا داسې راپور خپور شو، چې د کندوز والي اسدالله عمرخیل، وسلهوالو طالبانو کورنيو ته د وژل شویو افغان سرتېرو د اکرامیې پېسې ورکړي.
د کندوز د والي دغه کړنه د ځينو ولایتي شورا او مدني فعالانو غوسې پارولې دي.
د یاد ولایت والي عمرخیل ویلي و، چې د وژل شویو سرتیرو د اکرامیه پیسو څخه یې له ۵۰ د زیاتو هغو طالبانو کورنیو سره مرسته کړې، چې اولادونه یې د دې ولایت په جګړو کې وژل شوي دي.
د کندوز دولایتي شورا منشي زرګل وایي، د طالبانو کورنیو ته د وژل شویو سرتیرو د اکرامیه پیسو ورکول ملي خیانت دی.
عالمي له حکومته غواړي، چې د دې قضیې په اړه بېتفاوته عمل و نهکړي او د حکومت حیثیت او اعتبار لهپاره دغه موضوع په جدي او قانوني توګه وڅیړي.
« د کندوز خلکو لهپاره دا یو بوږنونکی خبر دی، په رښتیا چې یو ملي خیانت بلل کیږي، د هغه چا حق چې خپل خوږ ځان یې د هیواد او زما دفاع لهپاره قرباني کړ او بیا دا واخلي هغو خلکو ته ورکړي، چې د دوی وینه یې تویه کړې، دا په خپله یو لوی ملي خیانت دی او په دې اړه باید د کندوز والي خلکو ته ځواب ووایي.»
د کندوز ځینې مدني فعلان هم طالبانو کورنیو ته د پیسو ورکول د نه توجیه وړ بولي او وایي، چې د عمرخیل دغه کار طالبانو سره یو ډول همکاري ده.
د کندوز دوه تنه مدني فعالان خدیجې نبيیار او مرضیې رستمي وویل، چې دغه کار د امنیتي ځواکونو پر روحیې منفي اغیز کوي.
خو د کندوز د والي ویاند سید محمود دانش سلاموطندار ته وویل، د امنيتي سرتېرو اکراميه طالبانو یا بلې هرې ډلې ته ورکول د والي له واکونو نه شمېرل کيږي.
دی زیاتوي، چې د والي له وروستيو خبرو موخه د "بوز کندهاري" سیمه په پیښه کې د بېوسلې وژل شويو خلکو له کورنيو سره مالي مرسته ده، چې هغه د طالبانو د کورنيو غړي دي.
د کندوز د والي ویاند زیاتوي، تیر کال د بهرنيو ځواکونو په هوايي برید کې چې په بوز کندهاري سیمه کې ترسره شوی و په هغې کې ځینې میرمنې، کوچنیان او د زیات عمر لرونکي کسان وژل شوي و.
د دوی لهپاره ولسمشرۍ ماڼۍ ۴ میليونه افغانۍ ځانګړې کړې وې، چې د یو لوړپوړي پلاوي له خوا ويشل شوي دي.
لهدې وړاندې هم د کندوز والي ددغه ولایت د طالبانو په لاس د سقوط پرمهال ویلي و، چې مرګ او ژوند د خدای په لاس کې دی، که د کندوز خلک د اوسپنې په صندوقونو کې هم پټ شي چې خدای وغواړي وژل کيږي؛ د والي دا څرګندونې هم هغه مهال د خلکو له نیوکو سره مخ شوې وې.
