د ۳۱ یرغمل شویو له ډلې نه د ۱۹ کسانو د خلاصېدو دوه اونۍ تېریږي او د پاتې ۱۲ برمته شویو کورنۍ حکومت پر ناغیړۍ تورنوي.
د یرغمل شویو کورنۍ اوس هم په زرنګار پارک کې د تحصن خیمې درولې دي. دوی پر حکومت نیوکه کوي او وايي، چې تر اوسه یې د پاتې یرغمل شویو کسانو په تړاو دوی ته معلومات نه دي ورکړي.
ولسمشر غني په یوه خبري کنفرانس کې د ۱۹ یرغمل شویو کسانو د خلاصون په ترڅ کې وویل، چې پاتې ۱۲ برمته شوي کسان به هم ژر تر ژره خلاص شي.
خو د دغو کورنیو غړي وايي، چې تر هغه به خپل تحصن ته دوام ورکړي؛ چې د دوی د کورنیو غړي نه وي راخلاص شوي.
د دوی په خبره، حکومت د برمته شویو په پټنځای نه دي خبر، حکومت باید جدي اقدام وکړي.
عبدالحسین چې د برمته شویو په ډله کې یې زوی او ورور شامل دي؛ وايي چې ۳ میاشتې کیږي چې ترې ناخبره دي او له حکومت نه غواړي، چې د برمته شویو د خلاصون له پاره هڅه وکړي.
حبیب الله چې زوی یې د برمته شویو په ډله کې دی؛ وايي چې زوی یې ژوندی دی حکومت دې د دوی د خلاصون له پاره هڅه وکړي.
د لسمشر ویاند اجمل عبید عابدي سلام وطندار ته وویل، چې حکومت د ۱۲ برمته شویو د خلاصون له پاره هڅه کوي او د امنیتي ملحوظاتو له مخې عامو خلکو ته معلومات نه شي ورکولی.
ورپه وخت کې مدني فعال باري سلام، سلام وطندار ته وویل چې دوی د ۱۲ برمته شویو کسانو د خلاصون له پاره له حکومت سره په تماس کې دي.
سلام وايي چې حکومت د پاتې برمته شویو کسانو د خلاصو په برخه کې بې پروا نه دی.
د تېر کال د کب میاشتې په ۴مه نېټه د زابل ولایت د شاه جوی ولسوالۍ په سیمه کې ۳۱ هزاره ګان چې کابل ته په لاره وه د وسله والو کسانو لخوا برمته شول.
د ۱۹ برمته شویو په خلاصون په اړه ولسمشر وویلي وو، چې د دوی د خلاصون په پار نه پیسې ورکړل شوي او نه هم کوم مجرم خوشې شوی.
له دې وروسته داسې راپورونه خپاره شول، چې د ۱۹ برمته شویو مسافرو د خلاصون په بدل کې ۲۲ اوزبک تبعه خوشې شول.
خو غني وویل، چې د ۱۹ برمته شویو د خلاصو له پاره هیڅ ډول معامله نه ده شوې.
