ولسي جرګې د خپلو استیضاحیه غونډو په دوام نن سه شنبې د (نومبر پر ۱۵مه) څلور وزیران استیضاح کړل، چې د مخابراتو او معلوماتي ټکنالوژۍ له وزیر څخه یې د باور رایه بېرته واخيستله او د کرنې او مالدارۍ، د مخدره توکیو پر ضد د مبارزې او د برېښنا او انرژۍ وزیرانو ته یې د باوررایې ورکړې.
ولسي جرګې د ۱۳۹۴ کال د پراختیایي بوديجې د ۷۰ سلنه د نه لګښت له امله د کرنې او مالدارۍ وزیر اسدالله ضمیر، د مخابراتو اومعلوماتي ټکنالوژۍ وزیر عبدالرزاق وحیدي، د برېښنا او انرژۍ وزیر علي احمد عثماني او د نشه یي توکیو پر ضد د مبارزې وزیره سلامت عظیمي استیضاح کړي وو.
وکیلانو، وزیرانو ته د هغوی په نه شتوالي کې د باور او نه باور رایو په موخه صندوقونه کېښودل، چې په پایله کې یې د برېښنا او انرژۍ وزیرعلي احمد عثماني ۱۱۵ تایيد او ۶۰ رد رایې، د کرنې او مالدارۍ وزیر اسدالله ضمير ۱۳۱ تایيد او ۶۲ رد رایې، د نشه یي توکیو پر ضد د مبارزې وزیرې سلامت عظیمي ۷۲ تایيد او ۱۱۴ رد رایې واخیستلې، چې درې واړه وزیران په استیضاح کې بریالي او په خپلو دندو پاتې شول؛ خو د مخابراتو او معلوماتي ټکنالوژۍ وزیر عبدالرزاق وحیدي د ۴۹ تایيد او ۱۴۷ رد رایو په ترلاسه کولو سره سلب صلاحیت شو.
د ولسي جرګې لومړي نایب عبدالظاهر قدیر له ولسمشر څخه غوښتنه وکړه، چې دې وزارت ته د باور رایو د تر لاسه کولو له پاره ولسي جرګې ته بل نوماند وروپېژني.
ولسې جرګې په روانې اونۍ کې ۱۳ تنه وزیران استیضاح کړي دي، چې له دې ډلې ۶ تنو یې له ولسې جرګې د باور رایې ترلاسه کړې او پاتې ۷ تنو د ولسي جرګې د باور رایې وانهاخیستلی شوې.
