د ولسي جرګې په نننۍ عمومي غونډه کې ځېنو وکیلانو پر خبریالانو برید د وینا پر ازادۍ برید بولي او له حکومته غواړي د خبریالانو امنیت او خوندیتوب ته جدي پام وکړي.
د جرګې غړی سید جمال فکوري بهشتي وویل، تېرو ۱۷ کلونو کې د افغان دولت او نړۍوالې ټولنې یوازېنۍ لاسته راوړنه د وینا ازادي او رسنۍ دي چې پر خبریالانو برید دغه لاسته راوړنه تر پوښتنې لاندې راولي.
د هغه په وینا، د کابل دوشنبې ورځې په برید کې د خبریالانو له وژل کېدو وروسته د هغوی کورنۍ له نورو ننګونو سربېره اقتصادي ستونزو سره مخ دي او حکومت باید دغه پېښه په جدي توګه تعقیب کړي.
ښاغلی بهشتي وايي، اړتیا ده د ټولو خصوصي بنسټونو د کارکوونکیو ګومارنې په اړه ولسي جرګه د قانون طرحه جوړه کړي ترڅو د خصوصي برخې د کارکوونکيو کورنۍ د ده په نهشتون کې له ستونزو سره مخ نهشي.
د ولسي جرګې رییس عبدالروف ابراهیمي هم وايي، د دولتي کارکوونکیو د ګومارنې قانون په څېر دې وکیلان د خصوصي بنسټونو د کارکوونکیو ګومارنې په اړه یوه طرحه جوړه کړي.
هغه زیاتوي، د جرګې د کورنیو دندو له اصولو سره سم باید وکیلان د دې وړاندیز وکړي چې داسې یو قانون ته اړتیا شته ده.
ورته وخت کې د حکومت اجرایوي رییس عبدالله عبدالله نن ورځ په کابل کې د مطبوعاتو نړۍوالې ورځې نمانځغونډې کې حکومت د هېوادوالو امنیت په تامینولو کې پاتې وبللو.
افغان حکومت داسې حال کې د مې له درېیمې د مطبوعاتو نړۍوالې ورځې په توګه نمانځنه کوي چې په وروستۍ یوې میاشت کې په کابل، کندهار او خوست ولایتونو کې ۱۱ خبریالان ووژل شول.
