په ټاکنو خپلواک کمېسیون کې یوه سرچینه د نوم نه خپرولو په شرط وايي، راتلونکې ولسمشريزې ټاکنې به د ۱۳۹۸ ل کال د وري میاشتې په ۳۱مه نېټه وشي.
ټاکل شوې یاد کمېسیون د چهارشنبې ورځ د ولسمشریزو او ولایتي شوراګانو ټاکنو نېټه اعلان کړي.
که څه هم د ملي یووالي حکومت ځینې منتقدین باور لري چې د حکومت مشران د ولسمشریزو ټاکنو کولو لهپاره اراده نهلري، خو داسې ښکاري چې د ټاکنو کمېسیون پرېکړه به په دې برخه کې شته ګنګوسې کمې کړي.
د ټاکنو خپلواک کمېسیون د رسنیو کمېټې مرستیال عبدالعزیز ابراهیمي هم وايي، له مدني ټولنو، سیاسي ګوندونو او پر ټاکنو د څار بنسټونو سره تر مشورې وروسته یې د ولسمشریزو او ولایتي شوراګانو ټاکنو نېټه مشخصه کړې او د چهارشنبې ورځ به یې اعلان کړي.
بلهخوا پر ټاکنو د څار بنسټونه نیوکه کوي چې کمېسیون د ولسي جرګې او ولسوالیو شوراګانو ټاکنو مهالوېش عملي کړی نهدی او په دې ملي پروسه کې یې خلکو ته د ګډون لازمې اسانتیاوې هم برابرې کړي نهدي.
د فیفا اجرايوي رییس یوسف رشید وايي، د ټاکنو کمېسیون تر ارزونې او تدبیر پرته د حکومت سیاسي فشارونو قرباني کېږي.
نوموړی زیاتوي، د ولسمشریزو ټاکنو نېټې اعلان د کمېسیون لومړیتوب نه دی؛ ځکه د قانون له مخې ۶ میاشتې مخکې د یادو ټاکنو نېټه اعلانېدلی شي، خو دا کار یې له سیاسي فشارونو څخه د حکومت ژغورلو لهپاره کړی دی.
د رشید په وینا، د ټاکنو کمېسیون باید د ولسمشریزو ټاکنو نېټې تر اعلان مخکې خپل عملي او عیني امکانات سنجولي وای. د ده په باور، اوس به د ټاکنو کمېسیون د یادو ټاکنو مدیریت کولو پرمهال له ګڼو ننګونو سره مخ شي.
