د افغانستان د بهرنیو چارو وزیر او د جمعیت اسلامي ګوند مشر صلاحالدین رباني وايي چې دا ګوند ولسمشريزو ټاکنو لهپاره خپل نوماند لري.
ښاغلي رباني دا څرګندونې د ناټو غړیو هېوادونو د بهرنیو چارو وزیرانو د غونډې په وروستۍ ورځ وکړې.
د ده په خبره، د نوماند د ټاکلو لهپاره خبرې روانې دي او په مناسب وخت کې به اعلان شي.
ښاغلي رباني د ناټو غړیو هېوادونو د بهرنیو چارو وزیرانو د وروستۍ ورځې د غونډې په اړه وویل چې غړیو هېوادونو د بهرنیو چارو وزیرانو د افغانستان په اړه خپلې ژمنې بیان کړې.
ده د افغانستان د سولې په اړه د ناټو سازمان او نړۍوالې ټولنې له قربانیو مننه وکړه او ویې ویل چې له پارلماني ټاکنو ملاتړ په ښکاره توګه له حکومته په دیموکراتیکه توګه د حمایت معنا ورکوي.
د هغه په وینا، ناټو سازمان د سولې په اړه د افغان حکومت د هڅو هرکلی وکړ او پهدې ډول بهیرونو کې د ښځو ګډون اغېزمن بولي. د افغانستان بهرنیو چارو وزیر په ښکاره ډول د کوم هېواد نوم وانهاخېست خو ویې وویل چې پهدې دوې ورځنۍ غونډې کې د سیمې له هېوادونو وغوښتل شول چې د وسلهوالو ډلو له ملاتړه لاس واخلي.
ټاکل شوې ده چې د افغانستان ولسمشریزې ټاکنې د راتلونکي کال د وري پر ۳۱مه نېټه وشي.
د ولسمشریزو ټاکنو د نټې له اعلان وروسته د سیاسي ګوندونو او جریانونو ترمنځ دې مرحلې ته د ورتګ لهپاره مشورې پیل شوېدي.
د افغانستان د بهرنیو چارو وزیر د خبري غونډې جریان دلته لیدلی شئ.
