که څه هم پاکستان د طالب ډلې پر سیاسي مرستیال ملاعبدالغني برادر او د حقاني شبکې پر مشر سراجالدین حقاني پاکستان ته د دوی پر سفر او د شتمنیو پر کنګل کېدو بندیزونه لګولي، خو د ملاعبدالغني برادر په مشري یوه طالب پلاوي پاکستان ته سفر کړی دی.
په قطرکې د طالبانو د سیاسی دفتر ویاند سهیل شاهین پر خپلې ټویټر پاڼې لیکلي چې د دغه دفتر مشر ملاعبدالغنی برادر په مشري یو پلاوی د پاکستان د بهرنیو چارو وزارت په بلنه یاد هېواد ته تللی دی.
د شاهین په وینا، د سولې په اړه تر نړیوالو د نظر رسولو په موخه دا سفرونه دوام لري او په نږدې راتلونکي به نورو هېوادونو ته هم سفرونه وکړي.
سره له دې چې پاکستان ته د طالب پلاوي د سفر په اړه د افغانستان حکومت غبرګون نه دی ښودلی، خو د چارو شنونکي د پاکستان دغه کار د افغانستان په کورنیو چارو کې لاسوهنه بولي.
د حقوق پوهانو ټولنې مرستیال سبحان مصباح وايي، د پاکستان له لوري طالب پلاوي ته د بلنې ورکول د افغانستان په چارو کې لاسوهنه او دغه راز د ملي حاکمیت د نقض په مانا دی.
د نوموړي په وینا، دولت باید ژرترژره په دې اړه خپل دریځ څرګند او په تړاو یې په کابل کې د پاکستان سفیر بهرنیو چارو وزارت ته احضار کړي.
د پاکستان حکومت هم تر اوسه په رسمي ډول د طالب پلاوي د وربللو او د خبرو د اجندا په اړه رسنیو ته څه نه دي ویلي.
موږ هڅه وکړه په دی اړه د افغان حکومت نظر هم واخلو، خو له هڅو سره سره و نه توانېدو چې د ولسمشرۍ ماڼۍ او بهرنیو چارو وزارت له ویندویانو سره خبرې وکړو.
د چارو یو بل شنونکی یونس فکور وایي، د پاکستان د بهرنیو چارو وزارت لهخوا طالب مشرانو ته رسمي بلنه او له هغوی سره د افغانستان د ځینو مسایلو په اړه خبرې کول هغه ادعاوې ثابتوي چې طالبان د پاکستان د سیاست د سیمهییزو وسیلو په توګه کار کوي او د طالبانو مشرتابه په پاکستان کې اوسېږي او په افغانستان کې د فعالیت پلان یې هم همالته جوړېږي.
فکور وايي، پاکستان نه یوازې له طالبانو نه د وسیلې په توګه کار اخلي، بلکې د افغانستان په چارو کې ښکاره لاسوهنه هم کوي.
د پاکستان د بهرنیو چارو وزارت د تېرې شنبې په ورځ اعلان وکړ چې د ملګرو ملتونو د امنیت شورا د ۲۲۵۵ پرېکړې له مخې پر ملابرادر او سراجالدین حقاني ځینې تحریمونه لګولي دي.
د ملګرو ملتونو د امنیت شورا د تحریمونو په کمېټه کې پر یادو کسانو د سفر بندیز او د وسلو پر لېږد د بندیز تر څنګ، د شتمنیو کنګل کېدل هم شامل دي.
