د هلمند د ولایتي شورا غړي او ځېني مدني فعالان وايي، چې په تېرو درېیو میاشتو کې دغه ولایت ته د وضعیت د څېړنې له پاره په لسګونو ورغلي پلاوي پلټنې نه کوي، بلکې هڅه کوي، چې خپل امتیازات ترلاسه کړي او بېرته پلازمېنې کابل ته ستانه شي.
د دوی پر وینا، دغه پلاوي د ملي شورا له غړیو او لوړپوړیو چارواکیو جوړ شوي وو، چې پایلو یې په هلمند کې په هیڅ ډول مثبت بدلون نه دی راوستی.
د هلمند ولايتي شورا مرستیال عبدالمجید اخندزاده وايي، له تېرو شپږو مياشتو راهیسې د دې ولايت په بېلابېلو سيمو کې پيل شوې جګړه ورځ تر بلې زور اخلي، خو له مرکز څخه ورغلي پلاوي یوازې په خپله خوخښه د پلاوو غړي وټاکل، ځکه خو هلمند ته هیڅ ګټه ونه رسولی شوه.
د ولایتي شورا د امنیتی کمېټې مشر بشیراحمد شاکر هم وایي، چې د هلمند په ناوړه امنيتي حالاتو د مرکزي حکومت تر څنګ ټوله نړۍ خبره ده، خو بیا یې همدې حالاتو د څېړلو له پاره داسې پلاوي ورلېږل کېږي، چې د ګټې پر ځای د ولس په سترګو کې خاورې شیندي.
اخندزاده وايي، چې ولایتي شورا موجوده وي؛ دغو پلاوو ته اړتیا نه شته.
په ورته وخت کې د دغه ولایت د مدني ټولنو فعالان هم وايي، چې له کلونو را په دې خوا په هلمند کې جګړه روانه ده، خو د مخنيوي له پاره تر دامهاله داسې طرحه او پلان نه دی جوړ شوی، چې له مخې يې د جګړې لمن ټوله شي.
د هلمند مدني ټولنې مشر سردار محمد همدرد او مدني فعال اغامحمد قریشي وایي، یوازې په نوم د پلاوو راتګ هیڅ معنا نه لري، بلکې په دې برخه کې باید عملي کار وشي.
د همدرد پر خبره، پخوا یې ویلي وو، چې د چارواکیو دغه ډول تګ راتګ پرته د دوی له شخصي ګټو او چکرو نه بله کومه ګټه نه لري.
د هلمند د والي وياند عمرځواک هم مني، چې دغه ولایت ته بېلابېل پلاوي تللي، خو د پایلو په اړه یې کوم نظر نه لري.
هڅه مو وکړه په دې اړه د لېږل شويو پلاو له غړو ددې ګوت نېونې په اړه ځواب تر لاسه کړو خو بریالي نه شو.
