د غزني ولایتي شورا غړی محمدنعیم توحیدي وايي، د طالبانو سرې قطعې تېره شپه د روزګان ولایت له لوري د غزني د مالستان ولسوالۍ اړوند د پولیسو په لومړۍ کرښې برید کړی چې د ۱۳ پولیسو په وژل کېدو سره دولتي ځواکونه شا تګ ته اړ شويدي.
ښاغلي توحیدي وویل، امنیتي ځواکونه اوسمهال د مالستان ولسوالۍ مرکز ته ستانه شويدي.
د هغه په وینا، د مالستان ـ روزګان ترمنځ پوله کې د دولتي ځواکونو تر کنټرول لاندې سیمې طالبانو نیولي دي.
د غزني ولایتي شورا غړي همدارنګه وايي، څو ورځې مخکې د مالستان مرکز ته د پوځ شاوخوا ۳۰ سرتېري استول شويوو؛ خو د عملیاتو اجازه نهلري.
هاخوا د غزني امنیې قومندانۍ ویاند احمداخان سیرت د امنیتي ځواکونو شا تګ ادعا بېاساسه بولي او وايي، د تېرې شپې نښته کې ۴ سرتېري وژل شوي او ۲ ټپیان دي.
د طالبانو تلفاتو په اړه تراوسه څه نهدي ویل شوي.
