د ټاکنیزو اصلاحاتو په کمېسیون کې د اصلاحاتو د څرنګوالي پر سر اختلاف راپيدا شوي دي.
د دغه کمېسیون ځېنې غړي وايي، چې وړاندیز شوې طرحې عملي نه دي او د خلکو د قناعت وړ به هم ونه ګرځي.
شاه محمود میاخېل چې د دغه کمېسیون غړیتوب لري؛ وايي، د کمېسیون له طرحو سره موافق نه دی او خپله طرحه به ډېر ژر د رسنیو له لارې له خلکو سره شریکه کړي.
میاخېل زیاتوي، چې د دې کمېسیون بل غړی کاوون کاکړ هم د ټاکنیزو اصلاحاتو د وړاندیز شوو طرحو سره موافق نه دی.
ده له سلام وطندار سره په خبرو کې وویل، چې دوی په خپلو کې د طرحو پر سر په خپلو کې سره بحثونه کوي.
ښاغلي میاخېل زیاته کړه: "د اصلاحاتو د رامنځته کولو لپاره دوی خپلې طرحه لري، د کمېسیون د نورو غړو له طرحې سره موافق نه دي او دغه طرحې یواځې د اصلاحاتو د څرنګوالي په اړه دي."
په ورته وخت کې د ټاکنیزو اصلاحاتو کمېسیون رییس شاه سلطان عاکفي د دوی ترمنځ د طرحو د اختلافي مواردو په اړه سلام وطندار ته وویل، چې دغه طرحې نهايي نه دي او غواړي د اصلاحاتو د راوستلو په پار وړاندیزونو ته په طرحو کې ځای وکړي.
عاکفي همدا راز وویل، چې "د اصلاحاتو د رامنځته کولو لپاره پر مسایلو بحثونه روان دي او دا د هر چا حق دی، چې د سمون لپاره متفاوت نظرونه وړاندې کړي."
نوموړی په طرحو کې د اختلافي بحث په اړه وویل، چې تر اوسه بحثونه جریان لري او هر کله چې طرحې نهايي شوې؛ نو په خپله به دا په ډاګه شي، چې د سمون راوستلو په برخه کې کوم اختلافي موارد موجود وو.
دا په داسې حال کې ده، چې څو ورځې وړاندې د ټیفا بنسټ رییس نعیم ایوب زاده سلام وطندار سره په خبرو کې د ټاکنو خپلواک کمېسیون په بې غورۍ تورن کړ او وویل، چې دغه اداره د مدیریت له ضعف سره مخ ده.
ایوب زاده وایي، په ټاکنو کې ځند د ولسواکۍ بهیر ته زیان رسوي او زیاتوي، چې دغه کمېسیون باید د ټاکنیز مهالوېش له مخې هم مهاله ټاکنې پیل وکړي، خو وايي، چې دغه بنسټ د حکومت په پرېکړو پورې تړلی دی.
نوموړي همداراز ویلي وو، چې دوی باید خپل منځي اختلافاتو ته د پای ټکی کېږدي.
د ټاکنیزو اصلاحاتو کمېسیون د رامنځته کېدو پر سر د ولسمشر غني او اجرایه رییس عبدالله ترمنځ هم ډېر اختلافات راپيدا شوي وو، چې بلاخره له څو میاشتني ځنډ وروسته په دې و توانېدل، چې د دواړو مشرانو له خوا په شریکه دغه کمېسیون رامنځته شي.
