د فاریاب ولایت د ګرزیوان ولسوال ملافیضالله سلام وطندار ته وویل چې د ولسي پاڅونوالو ځېنو قوماندانو د ګرزیوان ولسوالۍ خواجهغار، یوخن، درهشاخ، تخاره، ابباریک او بهارک سټراټیژیکې نقطې په طالبانو پلورلې دي او خپله د مزارشریف ښار ته تللي. ده وویل چې د پاڅونوالو قوماندانانو دا ۳۰ کلي په ۱۳ سوو زرو افغانیو پلورلي دي.
د ګرزیوان ولسوال زیاته کړه چې یوازې د ولسوالۍ بازار ته نږدې کلي د دولت په ولکه کې دي.
د ملافیضالله په وینا، دې قوماندانانو له پخوا نه له طالبانو سره لاس لرلو او په هر ځای باندې د بريد پرمهال به یې هغوی ته زمینه برابروله.
ده له حکومته د مرستې غوښتنه وکړه او زیاته یې کړه، که مرسته ور ونه رسېږي؛ پاتې کلي به هم د طالبانو ولکې ته ولوېږي.
په ورته وخت کې د فاریاب ولایتي شورا غړی صبغتالله سېلاب طالبانو ته د ګرزیوان ولسوالۍ د کلیو سپارل تایيدوي او دولت له ولسي پاڅونوالو سره په مرستو کولو تورنوي.
د ګرزیوان ولسوال دا هم وویل چې د ولسي پاڅوانوالو هر قوماندان له دولته د میاشتې ۱۵۰۰۰۰ افغانۍ معاش اخېستلو.
لهدې سره هممهاله د فاریاب د امنیې قوماندانۍ ویاند کریم یورش سلام وطندار ته وویل چې د سیاسي ګوندونو ترمنځ دوښمنۍ او د ولسي پاڅونوالو قوماندانو ترمنځ جنجالونه د دې لامل شوي چې ځېنې کلي سقوط وکړي.
ده په ټینګار سره وویل چې د ګرزیوان ۷۵ سلنه ولسوالي د دولت په ولکه کې ده.
د ګرزیوان ولسوال ملافیضالله څه موده مخکې ویلي وو چې د ولسي پاڅونوالو یو قوماندان د خپلو ۸۰ کسانو په ګډون د طالبانو له لیکو سره یوځای شویدی.
وسلهوالو طالبانو تر دامهاله پهدې اړه څه نهدي ویلي.
