د کندهار د امنیه قومندانۍ مطبوعاتي مسوول دویم څارن ضیا دراني نن سلام وطندار ته وویل چې پهدې ولایت کې «د مهدي اخرزمان لښکر» په نامه د دولت وسلهوالو مخالفانو یو ډلې فعالیت پيل کړیدی.
د نوموړي په باور، د دې ډلې مشر منصور نومېږي او د کشفي معلوماتو پر بنسټ په کابل کې ژوند کوي.
درانی همدارنګه وايي، ملي پولیسو د خلکو په مرسته د یادې ډلې ۱۶ تنه فعال غړي د ډنډ ولسوالۍ د «کرز» په سیمه کې له یو پټنځایه نیولي دي.
د ده په وینا، نیول شويو کسانو سره يې په زیاته اندازه زړې تورې، زغرې، ډالونه، نېزې او د جنګونو نور پخواني سامانالات هم نیولي دي.
یادو نیول شویو کسانو منلې چې د «مهدي اخرزمان لښکر» ډلې غړي دي او نور نو د دنیا خاتمه رارسېدلې او ساینس به سقوط کوي، نو ځکه دوی له پخوانیو جنګي سامانالاتو څخه کار اخلي.
د کندهار عام اوسېدونکي او مدني فعالان وايي، دا د بهرنیو هېوادونو دسیسه ده او تر ټولو زیات تاوان يې عام ولس ته رسېږي.
د کندهار دوه تنه اوسېدونکي عبدالله کاکړ او حفیظالله پوپل وايي، له جنګه ستړي دي او د دې ډلو پیداکېدل جګړو ته د پټرولو د ورشیندلو په معنا دي.
د دوی په وینا، د یادې ډلې فعالیتونو اندېښمن کړي او له دولته د دې ډول ډلو د مخنیوي غوښتنه کوي.
د کندهار د ولایتي شورا غړې خالده هم وايي، دا ډول مخالفې ډلې نه یوازې د دولت بلکي د عامو خلکو لهپاره هم د دوښمنۍ معنا لري.
دا زیاتوي، عام کندهاریان له دولته د امنیت غوښتنه او د داسې ډولو د مخنیوي غوښتنه کوي، ځکه افغانان نور سوله غواړي او په رښتیا سره له جګړو ستړي دي.
د کندهار د ولایتي شورا د غړي خالدې په خبره، عام خلک د دولت تر شا ولاړ دي او تل هڅه کوي، د پردۍ جګړې مخه ونیول شي.
