د پکتيا ځايي چارواکي وايي، چې نن شنبه سهار ۶ او ۱۰ بجو ترمنځ وسله والو طالبانو د دغه ولایت په سېد کرم ولسوالۍ کې په لسګونه مسافر برمته کړي.
د پکتيا د ولايتي شورا منشي محمد رحمان قادري سلام وطندار ته وويل، چې د سېد کرم ولسوالۍ د بډم په سيمه کې طالبانو شاوخوا څلور ساعته لار بنده کړې وه، چې نږدې ۳۰ موټر يې له مسافرو ډک له ځانونه سره بيولي دي.
د پکتيا امنيتي چارواکي پېښه تايدوي او وايي، چې وسله والو يو شمېر مسافر له ځانونو سره بيولي دي.
د پکتيا امنيه قومندان پاسوال زلمي اوريا خېل سلام وطندار ته وويل، په دغو مسافرو کې ښځې او ماشومان هم شامل دي، خو د شمېر په اړه يي څه ونه ويل.
اورياخيل وايي، د مسافرو د خلاصون له پاره امنيتي ځواکونه سيمې ته رسيدلي.
د طالبانو وياند ذبیح الله مجاهد سلام وطندار ته ويلي، چې د دغو کسانو له ډلې به یواځې ۱۹ دولتي کسان برمته کړي.
نوموړي زياته کړې، تر اوسه يې ۸ کسان پېژندلي، چې په دولت کې دندې لري او په وينا يې د پاتې کسانو د چاڼولو له پاره هڅې روانې دي.
پټه دې پاتې نه وي، چې څو مياشتې وړاندې په همدې سيمه کې وسله والو طالبانو د څمکنيو ولسوال په ډزو وواژه.
سېد کرم ولسوالۍ د پکتيا له نسبتاً باامنه ولسواليو په ډله کې شمېرل کيږي، خو په لرو پرتو سيمو کې يې وسله والې ډلې فعالې دي او په غرونو کې پټنځایونه لري.
