افغانستان بوییچه ملکی خذمت‌لر ایشلاوچی‌لری نینگ 15 کونلیک آلقیشی آیلیگی یا-ده هییت‌لیگی 20 کون آرتده قالدیریلیب 9 وزیرلیک و باش‌قاره‌لاوچیلیک اداره‌سی ایشلاوچی‌لریگه توللندی. جمهور رئیس غنی ایسه آلقیشی آیلیک یا-ده هییت‌لیک بیر هفته جریانیده توللنیشی خصوصیده بویروغ بیرگن ایدی.
سلام‌وطندارگه صحبت بیرگن مالیه وزیرلیگی سوزلاوچیسی شمروزخان مسجدی نینگ ایتیشیچه، ساغلیق‌نی سقلش، حج و اوقاف، ترانسپورت، چیگره‌لر، قوم و قبایل، عیاللر، مخابرات و معلومات، کانلر و پترولیم، اقتصاد، ایکینچیلیک وزیرلیک‌لری و باش‌قاره‌لاوچیلیک اداره‌سی 15 کونلیک آلقیشی آیلیک توللنیشی حجتی‌نی مالیه وزیرلیگی‌گه یوبارگن.
اونگه کوره، قالگن اداره‌لر حاضرگی اختصاصی بودجه‌دن 15 کونلیک آلقیشی آیلیک‌نی توللش‌لری کیره‌ک و مالیه وزیرلیگی ییل اورته‌سی تیکشیروویده نظرگه آلینگن بودجه‌نی اولرنینگ اختیاریده قویه‌دی.
صناعت و سوداگرلیک، ایچکی ایشلر، مدافعه، سوو و برق و باشقه بیرقطار وزیرلیک‌لر حاضرگه‌قدر ایشلاوچی‌لری‌نینگ آلقیشی آیلیگی‌نی توللمه‌گن‌لر.
صناعت و سوداگرلیک وزیرلیگی سوزلاوچیسی سمیر رسانینگ ایتیشیچه، آلقیشی آیلیک توللنیش جریانی اوستیگه ایش قیلینماقده و یقین آره‌ده توللنه‌دی.
روزه هییت بیره‌می مناسبتی بیلن جمهور رئیس تامانیدن بیریلگن فرمان اساسیده، دولت تشکیلاتی نینگ بوتون ملکی خذمتچی‌لریگه دولت حسابیدن هییت‌لیک صفتی گه 15 کونلیک آلقیشی آیلیک توللنیشی کیره‌ک.
