هرات پولیس قوماندانلیگی‌نینگ سوزلاووچیسی عبدالرووف احمدی‌نینگ بوگون ایرته‌لب سلام وطندارگه، یوزلرچه جنگری طالب اوتگن کون کیچ قورون هرات‌نینگ کشک کهنه تومنی اوستی‌گه هجوم اویوشتیرگن‌لیک‌لرینی ایتگن.
جناب احمدی‌گه کوره، بو هجوم ده مذکور تومن‌نی نیچه قشلاغی طالب‌لر قولیگه توشگن؛ بیراق امنیتی کوچلر مذکور تومن‌ده عملیاتی‌نی باشله‌گن.
هرات ولایتی کینگش اعضاسی‌دن بیری عبدالرسول جمشیدی‌گه کوره، مذکور ولسوال‌لیک اوستی‌گه هجوم اویوشتیرگن طالب‌لر رقمی بیرمینگ‌دن کوپراق بولگن. اما، مملکت غربی‌ده‌گی 207 ظفر قول اردوسی‌نینگ قوماندانی تاج‌محمد جاهد، جنگری طالب‌لرنینگ سانی 400- 500 نفر بولگن لیگی‌نی ایتگن.
جناب جمشیدی‌گه کوره، جنگری طالب‌لر بادغیس و هرات ولایتی نینگ رباط سنگی تومنی‌دن کشک کهنه تومنیده توپله‌نیب مذکور ولسوال‌لیک‌نی قولگه آلیش‌گه قصد قیلگن.
هرات ولایتی، کشک کهنه ولسوال‌لیگی خلقی نینگ نماینده‌سی‌گه کوره، حاضرگچه مذکور تومن‌نی 8 قیشلاغی جمله‌دن چشمه‌خاکی، علی آباد، شاه پوری، قلعه‌غفور و قلعه محمدآباد قوراللی طالب‌لر تامانیدن تصرف ایتیلگن.
هرات پولیس قوماندانلیگی نینگ سوزلاووچی‌سی‌گه کوره، عملیات حاضرگه قدر دوام ایتماقده، نتیجه ده بیر پولیس هلاک بولگن و باشقه ایکّی ته‌سی یره‌لنگن.
شونینگ‌دیک هرات پولیسی سوزلاووچیسی نینگ ایتیشیچه، مذکور ولسوالیک‌ده امنیتی کوچلر و طالب‌لرنینگ آره‌سیده یوزبیرگن توقنه‌شووده اونلرچه طالب هلاک بولگن.
هلمند ولایتی‌ده اوز نامی فاش ایتیلیشی‌نی ایستمه‌گن بیر منبع نینگ سلام وطندارگه ایتیشیچه، قوراللی طالب‌لر اوتگن کیچه مذکور ولایت‌نینگ موسی قلعه تومنی، کینجک و تخته پل قیشلاق‌لریده پولیس پوسته‌سی اوستی‌گه هجوم اویوشتیرگن.
اوشبو امنیتی رسمی‌گه کوره، توقنه‌شوو حاضرگچه دوام ایتماقده، نتیجه ده 40 دن کوپراق طالب هلاک بولگن. منبع نینگ ایتیشیچه، بو توقنه‌شوو جریانی‌ده 16 پولیس هم هلاک بولگن.
هلمند والی‌سی‌نینگ سوزلاووچیسی عمر زواک، موسی قلعه‌ده امنیتی کوچلر و طالب‌لر آره‌سیده یوزبیرگن توقنه‌شوونی تصدیق‌لب بیراق تلفات توغریسیده معلومات بیرمه‌گن.
قوراللی طالب‌لرنینگ سوزلاووچی لریدن بیری قاری یوسف احمدی میدیاگه پیام یوباریب هجوم مسوولیتی‌نی تن آلیب ادعا قیلیشیچه، بو توقنه‌شووده 25 پولیس هلاک ایتیلگن.
موسی قلعه هلمند ولایتی‌نینگ ناتینچ ولسوال‌لیک‌لریدن بیری سنله‌دی.
بهار فصلی باشلنی بیلن طالب‌لرنینگ هجومی مملکت ایریم ولایتلریده کوپیگن و حاضرگی کون‌لرده امنیتی کوچلر مملکت بویلب نیچه ولایت‌ده جنگری طالب‌لر بیلن توقنشماقده.
