فاریاب محلی رسمیلرینینگ ایتیشیچه، امنیتی کوچلر مذکور ولایت قیصار و المار تومنلریده آلغهیب بارماقده.
فاریاب ولایتی المار و قیصار تومنلری ناتینچ منطقهلریده قوراللی طالبلرنینگ تازهلش «7- قیلیچ» ناملی عملیات نیچه کون آلدین یولگه قوییلگن.
اوشبو عملیات، فاریابدهگی حربی کوچلر قومندانی جنرال شیرینشاه کوهبندی آرقهلی رهبرلیک بولهدی.
فاریاب سرپرستی عبدالستار بارزنینگ اوتکن دوشنبه کون، کیچ قورون سلاموطندارگه ایتیشیچه، بو عملیات آلغه باریشی قیصار تومنی نهرین منطقهسیده خلق پولیس کوچلری اوچون امنیتی پوسته ایجاد ایتیلیشی باعث توختهتیلگن.
جناب بارزگه کوره، کشفی کوچلر، قیصار تومنی نهرین منطقهسیده اولتیریش اویلرنی تیکشیروگه باشلهگن.
فاریاب سرپرستینینگ کوپهیتیریشیچه، بو عملیات، ملی حربی، ملی پولیس، ملی امنیت، عام نظملاوچی کوچلر، خاص قطعه پولیسی و کماندو کوچلری اشتراکیده یولگه قوییلگن.
اونینگ ایتیشیچه، امنیتی کوچلر حاضر المار تومنی قرایی منطقهسیده 18 کیلومتر آب گردان توغانی تامان آلغه بارگنلر.
جناب بارزگه کوره، حاضرگه قدر بو عملیاتده 43 طالب هلاک بولیب یره لنگنلر، بیراق امنیتی کوچلر و تینچ اهالیگه زیان ییتمهگن.
باشقه تاماندن، فاریاب ولایتی کینگش باشلیغی سیدعبدالباقی هاشمینینگ ایتیشیچه، امنیتی کوچلر حاضرگچه المار و قیصار تومنلریده 40 کیلومتر آلغه بارگنلر.
اونگه کوره، حاضر خلق ایچیدن باش کوترگن کوچلر، امنیتی کوچلرگه یاردم بیریش اوچون 7- قیلیچ عملیاتیگه قوشیلگن.
فاریابده «7- قیلیچ» عملیاتی باشلنمسدن آلدین، بو عملیات جمهور رییس بیرینچی اورین باسری جنرال عبدالرشید دوستم آرقهلی باشقریلیشی ایتیلگن ایدی، بیراق شنبه کون، مدافعه وزیرلیگی رسمیلرینینگ ایتیشیچه، بو عملیات اردو کوچلر باش قومندانی قدمشاه شهیم آرقهلی باشقریلهدی.
مدافعه وزیرلیک سوزلاوچیسی اورین باسری دولت وزیرینینگ ایتیشیچه، شمالده جنرال دوستم امنیتی کوچلرگه روحیه بیریش و دولتگه قرشی قوراللی عصیانچیلرنینگ تینچلیک لایحه سیگه چقیریش مقصد بیلن حضور تاپهدی.
