هلمند ولایتیدن ییتیب کیلگن گزارشلرده نادعلی ولسواللیگی همده لشکرگاه شهرینینگ تورتینچی حوزهسیگه تیگیشلی منطقه ده قتیق اوروش بارلیگی خبر قیلیندی. مذکور اوروش بوندن بیش کون آلدین قوراللی طالبلر ولایتده ملی پولیس پوستهلریگه هجوم قیلگنده باشلنگن ایدی.
ایتیلیشیچه، مذکور اوروشده هنوزگچه جنگری طالبلرنینگ 160 نفری همده ملی کوچلرنینگ 25 عسکری هلاک ایتیلگن.
ولایت امنیه قوماندانی نبیجان ملاخیلنینگ سلام وطندارگه ایتیشیچه، ملی کوچلر نادعلی و گرشک ولسواللیگیدن تشقری لشکرگاه شهرینینگ تورتینچی حوزهسیگه قرهشلی «باباجی» منطقهسیده هم عملیات باشلهگنلر. او، مذکور عملیات هوا و ییردن اوتکزیلگن لیگینی ایتگن.
جناب ملاخیل، هلمند ولایتیدهگی جاری اوروش قوراللی طالبلرنینگ مولوی ناصرناملی قوماندانی تامانیدن رهبرلیک ایتیلهدی دیگن.
عین حالده، ملاخیل هوا ینه ییردن اوتکزیلگن ییریک عملیاتده طالبلرنینگ بلند مرتبهلی قوماندانلریدن ملاغنی و ملاقیوم ایکی همکاری بیلن اولدیریلگنلیگینی تیلگه آلگن.
ملاخیلنینگ ایتیشیچه، ملی کوچلر اویمه – اوی عملیات اوتکزیش اوچون محلده کوپریک قوریش ایش لرینی باشلهگنلر دیگن.
شونینگدیک ملاخیل، منطقه اهالیسیگه امنیت بوتونلی تامین ایتیلیشی اوچون ایشانچ بیرگن. ایتیلیشیچه، هلمند ولایتیدهگی اوروش نینگ کته قسمی ملی پولیس کوچلری تامانیدن باشقریلهدی.
