د تخار ولایت امنیتي چارواکي د یوې کورنۍ د مېرمنې له قوله وايي، چې باقي هغه وخت له خپل پلار نه سرغوڅ کړ، چې په خپلو دوو ۱۶ او ۱۸ کلونو لوڼو یې جنسي تېری کړی و.
د دې ولایت د امنیې قوماندان نورمحمد حکیمي وايي، چې قاتل تېښته کړې، خو دوه خویندې او مور یې د پولیس سره په بند کې دي.
د حکیمي په وینا، پېښه د تخار مرکز د تالقانو ښار په پوست خور کلي کې رامنځته شوې ده.
د تخار امنیه قوماندان وايي، چې تر اوسه د پېښې حقیقت مبهم دی او دوی په دې اړه خپلې څېړنې پیل کړي دي.
د دې ولایت د عامې روغتیا ریاست رییس ډاکټر حفیظ صافی پېښه تاییدوي.
نوموړي سلام وطندار ته وویل، چې د وژل شوي کس سره له تنې نه په "وحشتناک" ډول د چړې په وسیله غوڅ شوی دی.
وژل شوی کس ۵۰ کالن دی او پېښه تېره شپه ناوخته رامنځته شوې ده.
