عدلیې وزارت وایي، چې د ۶ میاشتو په ترڅ کې دوی د ځمکو د غصب په تړاو د دولت ۴۰۳ دوسیې پر مخ وړي، چې ځینې یې د دولت په ګټه او ځینې یې د دولت په ضرر پاې ته رسېدلي دي.
د عدلیې وزارت ویاند محمد امان ریاضت نن (دوشنبه) په کابل کې د عامه شتمنیو د حقونو ملاتړ له پاره جوړه شوې غونډه کې وویل، چې په ۶ میاشتو کې دې وزارت د دولت د عامه شتمنیو د ملاتړ ۴۰۳ دوسیې چې پیسې، ځمکې اپارتمانونه او دوکانونه په کې شامل دي پر مخ وړي چې ۱۳۱ د دولت په ګټه ۱۴ د دولت په ضرر او په پاتې نورو ېې کار جریان لري.
ریاضت زیاتوي، د ۹ زره ۴ سوه ۳۹ جریبه ځمکې دوسیې چې د عدلیې وزارت د قضیو ریاست مخ ته وړي د دولت په ګټه تمامې شوي، چې دغه ځمکې په کابل، هرات، کندهار، دایکندي او بغلان ولایتونو کې او هغه ځمکې چې د ولت په ضرر پاې ته رسېدلي په غور او ځینو نورو ولایتونو کې دي.
د عدلیې وزارت ویاند وویل، په دې کې ۹۳۱جریبه هغه ځمکه ده، چې دوسیې یې د دولت په ضرر پای ته رسیدلي دي.
د عدلیې وزارت ویاند وايي، دوی د هغو زورواکو نومونه نه شي اخیستلی، چې دولتي ځمکې یې په زور نیولي، ځکه چې ولسمشر دوی ته امر کړی، د هغه پر بنسټ دوی اړ دي د اطلاعاتو یوه کړنلاره او اطلاعاتو ته د لاس رسي کمېسیون جوړ کړي، چې په هغه کې هم هغه اطلاعات چې محرم دي او یا ملي ګټو سره په ټکر کې وي دوی یې د خپرولو اجازه نه لري.
همدارنګه د عدلیې وزارت ویاند دا هم په ډاګه نه کړه چې دولتي ځمکه د چا له خوا په زور نیول کېږي دولتي کسان دي او که نادولتي؟
