د ولسي جرګې وکیلان وایې له تېرې څه مودې راهېسې د هېواد په کچه پر لویو لارو ناامنیو زور اخېستی او وسله وال مخالفان په رڼا ورځ له موټرو مسافر راښکته کوي.
د ولسي جرګې په نننۍ عمومي غونډه کې ځینو وکیلانو وویل، د دغو ناامنیو پراخېدا د عامو خلکو اندېښنې لاپسې ډېرې کړې دي.
د وکیلانو په وینا په لویو لارو کې وسله وال مخالفان مسافر لوټوي، تښتوي او ان وژني یې.
د دې جرګې غړې نظیفې ذکي وویل، چې د هېواد ټولې لویې لارې په ځانګړې توګه د هرات – کابل لویه لاره ډېره ناامنه شوې.
ذکي د ولسي جرګې پر رییس غږ وکړ، چې د امنیتي ځواکونو مسولان دې ولسي جرګې ته را وغواړي، د دې پوښتنې ځواب دې راکړي، چې ولې یې د سلګونو امنیتي ځواکونو په موجودیت کې د لويې لارې امنیت نه شي نیولی؟
شا وخوا درې اونۍ وړاندې ناڅرګندو وسله والو د کندهار پر لویه لاره د زابل په شاه جوی ولسوالۍ کې ۳۱ هزاره مسافر له بسه ښکته کړي، چې تراوسه یې برخلیک معلوم نه دی.
دغه راز، تېره ورځ ( ۲۰۱۵م زيږديز کال د مارچ په ۱۵مه) د ناپېژاندو وسله والو له لوري بیا هم په غزني کې ۹ تنه مسافر له موټر ښکته کړل شول، چې ۸ یې په هماغه ورځ خوشې او یو یې اوس هم د وسله والو سره په بند کې دی.
په همدې حال کې د ولسي جرګې بل غړی حاجي محمد هاشم هم د لویو لارو ناامنه کېدو څخه اندېښنه وښوده او زیاته یې کړه، چې د هېواد په شمال کې هم لویې لارې ناامنه شوې دي.
نوموړي تور ولګاوه، چې د لویو لارو په ناامنه کولو کې ځینې دولتي کسان هم لاس لري.
د ولسي جرګې لومړي نایب حاجي عبدالظاهر قدیر چی د نننۍ عمومي غونډې مشري یې کوله وویل، پر لویو لارو د ناامنیو د ډېرېدو په اړه به د راتلونکې اونۍ د دوشنبې په ورځ امنیتي مسولین د پوښتنو ځوابولو لپاره را وغواړي.
دا لومړی ځل نه دی، چې ولسي جرګه د هېواد د امنیتي وضعیت او په ځانګړي ډول د لویو لارو د ناامنه کېدو په اړه اندېښنه ښيي، بلکې تردې وړاندې یې هم د ناامنیو په تړاو امنیتي چارواکي، عمومي او د کمېسیون غونډو ته ورغوښتي دي.
